AK aamma NUSUKA: Akileraarutit qaffannagit aaqqiigitsi
Aningaasarsiorneq pillugu ilisimatuut politologillu aamma oqaatigaat innuttaasut atugarissaarnerulernavianngitsut akissarsianut akileraarutit tunngavigalugit iliuuseqartoqanngippat.
Ilisimatuulli taama inerniliinerat Atorfillit Kattuffiannit NuSuKamiillu illuatungilerneqarpoq. Akileraarutimmi annertussusaat tunngavigalugit akileraarusiisoqartalissappat akissarsiagissaarnerusut eqqorneqassammata. Atorfillit Kattuffianni siulittaasoq Erik Hammeken ima oqarpoq:
- AK-mi Inuit Ataqatigiinniit, Siumummiit Atassumillu allanillumi ilaasortaqarpugut, kisianni AK-imiit nalinginnaasumik akileraarutit qaffanneqarnissaat tapersersunngilarput. Taamatullu aamma akissarsiaqqortunerit akileraarnerunissaat aamma tapersersunngilarput, pissutigalugu ilaasortagut akissarsiaqalaarnerusut taakkua meeqqerivinnut takammiisumik akiliisarmata. Allanut sanilliullugit tamakkiisumik akilersuisuupput, soorlu ineqarnermut tapiissutinik pisarnatik. Aamma utoqqalinersiaqaleraangamik utoqqalinersiat tamakkiisumik pinngisaannarpaat, tassa aningaasarsiarisartakkat angissusaat aallaavigineqartarmata, Erik Hammeken taama oqarpoq.
Kalaallit Nunaanni innuttaasut atugarissaarnerulernissaannut periarfissat piulereersut, Erik Hammeken NuSuKamilu pisortaq Ole Aggo Markussen isumaqarput.
- Akileraartarneq pillugu ataatsimiititaliamik pilersitsisoqarani allaffissornerulli aningaasartuutaasa annikillisarneqarnissaat pillugu ataatsimiitialiamik pilersitsisoqartariaqaraluarpoq. Nunatta karsiani amigartoorutit matussuserneqassappata nammineq aningaasartuutigisat annikillisarneqartariaqarput, Ole Aggo Markussen oqarpoq.
