AK aamma Namminersorlutik Oqartussat isumaqatigiissuteqarput

Namminersorlutik Oqartussat isumaqatigiinniartartui eqqissillutik juullisiorsinnaanngorput. Taakkumi tjenestemandit kattuffiannik - ulluinnarni Atorfillit Kattuffiannik taaneqartartumik - ukiuni pingasuni atuuttussamik isumaqatigiissuteqaqqammerput.
Allattoq Elisa Isaksen
decembarip 22-at 2009 16:55

Atorfillit Kattuffiata isumaqatigiissuteqarfigisai, isumaqatigiinniarnermi tunngavigineqartut tassaapput, Namminersorlutik Oqartussani kommuninilu sulisut 595-it, aningaasarsianillu 185 millionit koruuninik amerlassuseqartunit 10,11 procentit isumaqatigiissutigineqarput.

Illuatungeriit isumaqatigiissuteqartut tusagassiuutinut nalunaarumminni ilisimatitsissutigaat, isumaqatigiinniarnermi inuutissarsiuteqalerniarluni ilinniarfinni ilinniartitsisut aamma tjenestemandit akissaatikinnerit pingaartinneqarnerunissaat isumaqatigiissutigigitsik. Tamatumunnga peqatigitillugu isumaginninnermi siunnersortit aamma tjenestemandinut assingusumik atorfillit soraarnerussutisiassaannut pisortat akiliutaat qaffaavigineqassapput.

Aningaasarsiat tunngaviusut ukiuni tullerni pingasuni, ukiut tamaasa 2,40 procentimik qaffariartassapput.