Ajutoortut sivisunerusumik utaqqisariaqalersinnaapput

Nunatsinni timmisartoq ataasituaq qulimiguullillu pingasut upalungaarsimanissamut pilersaarummi atorneqassapput. Air Greenlandip sapaatiuppamiit suliartoqqujunnaassappat, tamanna piviusunngorsinnaavoq.

Tamannalu sivisunerusumik utaqqisariaqarnermik ilaatigut kinguneqartarsinnaasoq, timmisartuutileqatigiit nassuerutigaat.

- Oqarsinnaasussaanngilanga utaqqisarnissaq sivisuallaartutut taaneqarsinnaanersoq, kisianni soorunami takorloorsinnaavarput, arlaatigut pisoqassagaluarpat qulimiguullit timmisartorluunniit sivisunerusumik apuunniartassasut, Air Greenland-imi sulisunut pisortaq, Mads B. Christensen, oqarpoq.

Ilulissani, Nuummi Narsarsuarmilu tamarmik immikkut qulimiguulik ataaseq aammalu timmisartoq King Air Nuummiittoq, Air Greenlandip upalungaarsimanissamut pilersaarumminni atugassarai.

Kisianni timmisartoq sapaatit akunneranni ullut arfinillit taamaallaat timmisartussaammat, aammalu timmisartortartut napparsimaleriataarsinnaammata, qulimiguullit kisimiillutik napparsimaruluttunik ajutoorsimasunillunniik angallassinissamut piareersimasooriaannaapput.

Tamatuma kingunerisinnaavaa, qulimiguullit upalungaarsimanermi piareersimasut avannarlersaat Ilulissaniittoq 1000 kilometerinik avannarparluni Qaanaamut ingerlaartoq.

Kisianni Nunatsinni innuttaasunut ajornartoorfimmi sivisunerusumik utaqqisitsisalersinnaaneq illersornearsinnaanersoq apeqqutigigatsigu, kalaallit danskillu pisortaasa piumasaqaataat aallaavigigitik Air Greenlandimiit akissutigaat. Tamaammallu Air Greenlandip timmisartortartullu aaqqiagiinngissuteqarneranni upalungaarsimanissamut pilersaarut innuttaasunut ullumikkutulli toqqissisimanartuusoq isumaqarput.

- Uanga paasinninnera naapertorlugu, pisariaqartinneqartutut pisortat naliligaat uani naammassineqarpoq. Ikiuukkiartornerup sivisunerusinnaanera uanga ernumanartutut isiginerlugu oqaaseqarfigikutsoorsinnaavara, kisianni qitiuvoq, taamatut upalungaarsimanissaq pisortat aalajangigarimmassuk. Ulluinnarni piusaqaatit sinnerlugit sullissisinnaanerput ajunngilluinnarpoq, kisianni aaqqiagiinngittoqartillugu naammassisartagassatsitut pisortat piumasaat, aaqqiagiinngittoqarnerani aamma naammassisinnaavarput, Mads B. Christensen oqarpoq.

Kisianni tassa upalungaarsimanissamut pilersaarut pisortat piumasaqaaataannik naammassinnikkaluartoq, IA-meersoq Isak Hammond, Uummannami najungaqartoq, naammaginnginngilaq.

- Assersuutigiinnarlugu Upernaviup eqqaa, Uummannap eqqaa aammalu Avanersuaq isorartuupilussuupput, ataatsikkortumik arlaatigut pisariaqatitsisoqassagaluarpat, naammassineqarsinnaanngereerpoq. Taamaattumik upalungaarsimanissamik pilersaarut akuerineqarsinnaanngilaq, Isak Hammond oqarpoq.

Air Greenland timmisartortartullu sinniisaat danskit isumaqatigiissaaniartarfianni aqagu naapissapput, tassanilu isumaqatigiissaaniartartoq isumaqatigiinniarnivinnik aallartitseriassaaq.

Air Greenland timmisartortartuminik ilaasunillu saqisunik sapaatiuppat suliartoqqusiunnaarniarluni tassa ilimasaarereerpoq. Isumaqatigiissummilli illua tungeriit ulluni tulliuttuni atsiunngippata, isumaqatigiissaaaniartartoq suliartoqqusiunnaarnermik kinguartitsissasoq ilimanarluinnarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat