Ajutoornerit nalunaarsukkanit amerlanerujussuusinnaapput

Nunatsinni suliffeqarfiit sullivimminni ajutoornernik nalunaarsuinissamut pisussaaffeqarput, pisussaaffilli amerlaasunit naammassineqartanngitsoq, Sullivinnik Nakkutilliisoqarfik naliliivoq. Siorna suliffimminni ajutoortut ukiunut siuliinut naleqqiullutik 15 procentingajammik amerleriaateqarsimapput. Tamanna pillugu Sullisivinnik Nakkutilliisoqarfiup pisortaa Arnaq Grønvoldt ima naliliivoq:

- Tamanna marloqiusamik nassuiarneqarsinnaagunarpoq, tassa ajutoorsimanerit nalunaarutigisarnissaat eqqumaffigineqarnerulersimagunarmat kisitsisit amerlanerupput. Tassani peqqutaagunarpoq paasisitsiniaanerit sunniuteqarnerulersimanerat, aappaatigulli imaassinaavoq suliaqarnerulertoqarsimanera pissutaasoq, tassa sanaartorfiit immaqa allanngorsimaput, portusuunik suliaqarnerit amerlanerulersimapput, taamalillutillu nakkartartut amerlanerulersimasinnaallutik.

Taamaattorli paasisitsiniaanerup sunniineratigut nalunaarutiginnittarnerit amerlisimanissaat ilimanarnerutikkini Arnaq Grønvild oqarpoq.

Ajutoornerit tamarmik nalunaarutigineqartanngitsut aamma oqaatigineqarpoq. Tamanna pillugu Arnaq Grønvold akivoq:

- Tamanna kisitsitigut takusinnaavarput, soorlu ukioq 2000-imili ajutoortut 168-iusimapput, taava siorna 2005-imi 299-iusimallutik. Ajutoortut 100-it sinnilaarlugit amerleriarsimapput.

Sullivimmi ajutoortoqarsimatillugu nalunaarutiginnittarnissaq assut pingaaruteqartoq Arnaq Grønvild erseqqissaavoq.

- Suliffeqarfiit inatsimmik unioqqutitsissanngikkunik nalunaarutiginittariaqarput. Inatsimmi allassimavoq; sulitillutit ajutooruit ajutoornerillu ullormi ataatsimi napparsimassutigigukku, taava tamanna Sullivinnik Nakkutilliisoqarfimmut nalunaarutigissavat. Aamma Sullivinnik Nakkutilliisoqarfiup tamanna pisariaqartippaa, paasissutissanik suliaqarnissaminut imaluunniit nakkutilliiartornissaminut tunngavissatut.