Ajutoorneq kukkusumik sitsiaallisaanermik pissuteqarpoq
Maniitsumi Brugsenimi nutaami natilersuisut tunisassiaq pujoralanngortitsissummut maqinnagu serpalittaalluni qalipaanermut atortumut maqissimavaat. Taamatut Permagreenimi immikkoortortaqarfimmi aqutsisoq Martin Nielsen KNR-imut paasissutissiivoq.
Gassi toqunartortalik najuussorneqartoq taaguuteqarpoq alkylalkoxysiloxane, taanna najuussugassaanngilaq ulorianarsinnaagami, natermut tarnutaavoq eqqortumilli atoraanni ulorianartuunngikkaluarluni, uumasut nakorsaat Mads Thor Madsen oqarpoq.
Tunisassiaq Antiplet Super naternik marrianik sitsiaallisaanerni atorneqartarpoq. Tunisassiarlu najuussunngikkaanni navianaateqanngilaq.
Brugsenimi sulisut arlaannik ajortoqartoq paasimmassuk Brugsen ualikkut nal. pingasunut matuneqarpoq.
Permagreenimi immikkoortortaqarfimmi aqutsisoq pisumit attortisimanerarluni KNR-imut oqarpoq. Permagreenimi sulisut ullaaq manna politiinit apersorneqarput namminneerlutillu Sullivinnik Nakkutiliisoqarfimmut attaveqarlutik.
Tamanna Jesper Guldager Labansenimit, Sullivinnik Nakkutilliisoqarfimmi nunap immikkortuani pisortamit uppernarsarneqarpoq. Taanna naapertorlugu ajutoorneq pillugu Sullivinnik Nakkutilliisoqarfimmiut politiinik aamma Permagreenimi sulisunik oqaloqateqareerput, ajortuunermilu pisut pillugit akisussaaffimmik inissiisinnaaneq pillugu misissuisoqalersoq oqaatigaa. Jesper Guldager Labansenilli pisumi immikkuualuttut paasissutissiissutigerusunngikkallarpai.
