Ajunngitsuliorniarluni sermersuarmi arsaannermi kalaallit ajugaapput

Kangerlussuup eqqaani Sermersuarmi nalinginnaanngilluinnartumik isikkamik arsaattoqarnerani kalaallit ajugaapput. Kalaallit unammititaat ilaatigut Julie Berthelsenimik peqataaffigineqartut utoqqasaanut Hinnerupimeersunut 3-2-mik ajugaapput. Taakku "Danmarkimi old boysit atunngitsuliullaqqinnerpaanik" taaneqartarput.
marsip 19-at 2013 08:52

Danskit nunatsinnut arsaakkiartut unamminissaat pivallaarneqanngilaq, arsaannermulli atatillugu sammisassarpapput sammineqarnerupput. Meeqqat 5-12-inik ukiullit Qinnguata Atuarfianeersut tamaasa peqataaffigisinnaasaannik meeqqat ulloqartinneqarput. Meeqqaat aamma tallimanngornermi isikkamik arsaannermik ilinniarfimmut peqataapput kiisalu timersornermi atortorissaarutinik Projekt StøtGrønlandimut tunniunneqarsimasunik tunineqarput.

-Kalaallit Nunaanni meeqqanik inuusuttunillu sapinngisaminik annertunerpaamik ikiuiniarnitsinni alloriarneruvoq annertuupilussuaq. 2009-miilli isikkamik arsaanneq aqqutigalugu silarsuarmik allanngortitsiniarluta sulisasuteqalerpugut ilaatigullu Røde Kors, ADRA Danmark aamma Unicef suleqatigalugit timersornermut atortissaarutinik 3.365.000 kr.-inik naleqartunik, illunik 33-nik Afrikamilu meeqqanut inuusuttunullu akiuussutissanik 25.000-inik tunniussinikulluta, Danmarkimi old boysit atunngitsuliullaqqinnerpaat siuttuat Simon Schiølin oqarpoq.

Projekt StøtGrønland Kalaallit Nunaanni kommunini sisamaasuni meeqqanut isikkamik arsaannermi atortorissaarutinik kommunimut ataatsimut 250.000 kr.-inik naleqartunik tunissuteqarniarpoq, taakkulu katillugit 1 million kr.-inik naleqarput.

Kalaallit Nunaanni meeqqanik inuusuttunillu ikiuinissatsinnut periarfissinneqarnerput, aammalu Julie Berthelsenimit tapersersorneqarnerput suliniummut peqataasinnaanitsinnut nuannaarutaavoq, aamma inuit allat atugaannik pitsanngorsaaniarluta suliniuteqarnitsinni peqataasunut 30-inut aningaasaliisunullu 70-it missaanniittunut nuannaarutissaavoq, Simon Schiølin nassuiaavoq.