Ajunaartut amerlanerujussuunissaat aarleqqutigineqarpoq
Japanimi nunap sajunnerata kingunerisaanik ajunaartut maanna 703-upput. Nuna sajummat tassaarsuaqarpoq, inuillu ajunaartut amerlanerunissaat aarleqqutigineqarpoq.
Allattoq Mads Lynge
Inuit 10.000-it Minamisanrikumi maqaasineqartut, Japanimi tv-qarfiup NHK-p nalunaarutigaa.
Illoqarfimmi innuttaasut tassani 17.000-it missaanniipput, maqaasineqartullu maanna ujaarineqarput.
Biilit, umiatsiat, illullu aseruatitersimasut takuneqarsinnaapput. Richterip nunap sajuttarneranik uuttuutaa malillugu nuna 8,9-mik sajuppoq, kingornalu tassaarsuaqarmat malingi 10 meterit missaanniipput.
Japanip ministeriunerata Naoto Kanip nalunaarutigaa sakkutuut 50.000-it annaassiniarnermut ikiueqataasut.