Ajunaartunik takunnittoq tupassimaqaaq

Ikummatissanik usisaammit Orisilamit Saarlumi Nukissiorfiit tankiata orserneqalernerani suleqataasoq, ajunaarnermillu isiginnittutuat ilaat, Boas Poulsen ima oqaluttuarpoq.

- Elværkimi sulisoq orsernissami ikioriartoqqummat ikioriartorpara. Slangeq siaariarlugu solarimik umiarsuarmit nunamut tankimut maqitsisarput. Slangi siaaramikku avasillilaariarlutik tankip tungaanut qummut naammatsinnissaanut utaqqilerpugut, Boas Poulsen aallartippoq.

Umiatsiamiittut marluk nunami slangersuarmik maqitsinermi atugassamik tigusisussat nuigamikkit kalerriipput tungitsinnut umiatsiaq sangutinniarlugu piareerlutik.

Angutit marluk angallataat motooriliuvoq qullersuarmik seqersartulik.

- Taarsereersimavorli sarfarnermillu. Tungitsinnulli sangoriarnermini sarfarnermik kinnguvoq. Taava kinngummat umiarsuarmioq nunami ilagisarput umiarsuarmut kalerriivoq kinngummata gummibådi aqqaqqullugu. Taava tuaviorlunga, arpallunga umiatsiaaraatilimmukarpunga umiatsiaq kinngunerarlugu oqaluttuullugit, Boas Poulsen nangippoq.

10 minutsit qaangiutinngitsut umiatsiaq tikippaat seqersartua qamereersimasoq motoorialu unereersimasoq.

- Tikikkatsigu inuttai saqquminngillat. Isumaqaraluarpugut umiatsiaaqqap iluaniissamut. Umiatsiaq puseqqasoq umiarsuarmut kalipparput. Kisianni amooraluaramikku inuttai peqanngillat, oqaluttuarpoq.

Umiatsiaaqqat takkuttut umiarsuarmiullu sakkortuunik seqersartoqarsimanngillat, seqersartullu pigineqartut, soorlu gummibådip seqersartua, sakkukippallaarsimavoq, ujaasinerminilu imaq sarfartorujussuusimavoq.

Nunaminngaanniit Boas Poulsen aamma umiarsuarmioq ataaseq kisimik isiginnittuusimagunarput, pingajortik elværkimi sulisoq illumut isersimammat.

- Ajunaartut takunngilai, qummukarlunga oqarfigivara, oqarpoq.

Aamma oqarpoq ajunaartut annanniuteqarpasinngitsut, taamaallaallu atallaat issusuut oqortut atorpasikkaat.

- Isiginnittuulluni tupannaqaaq, soorunami, Boas Poulsen naggasiivoq.

Boas Poulsen Orisilap Saarlumi tankersuarnik orsiinerani aatsaat ikiuutilinngilaq. Boas Poulsen nunaqarfimmiullu angallatillit allat angallatit takkussuuttut peqatigalugit nalunaaquttap akunnerini tallimani ujaasereersut, angutit qallunaat marluk 18-inik 47-nillu ukiullit timaat ipeqqasut nassaarineqarput.

Orsiaatip Orasilap Saarlumiinnermini Nukissiorfiit Pilersuisullu tankii immertussaasimagaluarpai.