Ajunaarnerup sunniutai qaangeruminaattuusinnaapput

Nunatsinni pinngortitaq qanillugu inuuvugut.

Ajunaartoqarnerneragut amerlasuut toqu qanimut isigalugu misigisarpaat.

Taamaakkaluartoq Asiami ajunaarnersuaqarneratut ittumik misigissutsinillu aalaterneqaataaqisunik malitsillip piareersimaffiginissaa ajornakusoortuuvoq.

Soorlumi nammineq toqusussanngorluni paasigaanni tassa inuunerup taamaanga killeqarneranik takunninnikkut.

- Nammineq piviusoq takullugu misigissutsikkut imaannaanngitsuusarpoq, nalunagu allat kisimik toqusussaanngitsut aamma nammineq toqusussanngorluni, psykolog-i Connie Gregersen nassuiaavoq.

- Nalunngikkaluarparput tamatta toqusussaalluta, naatsorsuutiginerli ajorparput ullumikkut pissasoq, kisiannili soorlu Asiami pisoqarnera eqqarsaatigalugu oqartoqarsinnaavoq aamma imaassinnaavoq tassa ullumikkut nammineq toqusussanngorluni, Connie Gregersen oqarpoq.

Taanna aamma isumaqarpoq ajunaarnersuaqartoqartillugu qisuariaatit tamarmik assigiittartut. Inuiaqatigiinni aamma ilaqarpugut ulluinnarni toqumik ajunaarnermillu misigisaqartartunik, soorlumi ukioq kingulleq nunatsinni imaatigut ajunaarsimasut 25-iusut.

Inuiaqatigiinni ajunaarnerit pisartut arlaatigut immikkut sillimaffiginiarneqarsinnaappat?

-Aap, ilaatigut taamaattoqarsinnaavoq ikiuillunga sulisarninni misilittakkakka eqqarsaatigalugit taama misigisaqartoqartarpoq tamakkulu sillimaffiginiarneqalertartutut ittarput, aamma toqungajassimasunik imaluunniit annaanneqarsimallutik misigisaqarsimasunik. Tamatuma malitsigisarpaa qamuuna misigissutsikkut assigiinngitsunik qisuariaateqarnernik, isumaqarpungalu nunarsuarmi sumiikkaluaruttaluunniit taamatut nalaataqarsimanermik qisuariaataasartut assigiittut, Connie Gregersen oqarpoq.