Ajunaarnersuarmut ikiuutissat suli amerliartorput

Asiami ajunaarnersuarmut atatillugu Sisimiormiut ippassaq 300.000 koruunit missaaniittut katersorsimagaat katersuiniarnermi aaqqissueqataasoq Agnes Johnsen Radioaviisimut oqarpoq.

Sisimiormiut 1300-t missaaniittut timersortarfissuarmut aggiasimapput, unnullu nuannersarfiusimaqaaq, alikkusersuisut arlaqarsimammata, inuillu tuniserisunnermik misigissuseqarsimapput.

Unnuup ingerlanerani timersortarfissuarmi innuttaasut asiami ajunaartut qassiunerinik TV-kut skærmersualerlugit malinnaatinneqarsinnaasimapput.

Maniitsumi røde korsip immikkoortortaa tallimanngormat aamma aqqissuussilluni ajunaarnersuarmut katersuiniarsimavoq.

Maniitsumi Røde kors, Maniitsup tusaataa Sømandshjemmelu ikioqatigiillutik ajunaarnersuarmut tallimanngormat katersuiniarput, Napasumi Kangaamiunilu inuttaasut aamma katersueqataagamik Maniitsormiut katillugit 125.000 koruunit ingerlateqqittussanngoraat, røde korsimi suleqataasoq Mimi karlsen oqarpoq.