Ajunaarnersuaqarnerani iliuusissat Aasianni sungiusarneqartut

Ajunaarnersuaqarnerani iliuusissanut Aasianni kalerriutigineqanngitsumik ataasinngormat sungiusartoqarpoq. Taamaammat mittarfik nalinginnaasumit ulapiffiunerusimasoq, politimestereqarfiup nalunaarutigaa.
Assi © : Google Street view
juunip 15-at 2016 05:29
Nutserisoq Ivik Kristiansen

Timmisartoq Dash-8 ilaasoqarluni inuttaqarlunilu mittarfiup avannaata tungaani ajornartoorluni mittoq nalunaarutigineqarpoq.

Ajunaarnersuaqartillugu oqartussaasut attaveqaqatigiinnerisa ataqatigiissaarinerisalu misilittarnissaat sungiusarnerup siunertaraa.

Peqataasullu ikittuinnaat sungiusartoqarniartoq nalusimanngilaat.

- Oqartussaasuni sulisut pisunut annertuunut piffissaq sivikitsoq atorlugu ornigussinnaanerat sungiusarnermi misittarneqarpoq. Sungiusarnermi pisuusaartitarineqartoq amerlanerit ilumoorsoraat, Aasianni politikommisæriugallartoq Arne Sandgreen Reimer oqarpoq.

Taanna naapertorlugu oqartussaasut sulilluarput. Attaveqaqatigiinnermili unammillernartoqarsimavoq.

- Suleqatigiilluni suliassani ilaanni pitsanngorsaanissamut politiit misissuisinnaanissaannik sungiusarneq periarfissiivoq, Arne Sandgreen Reimer oqarpoq.