Assi: Camilla Dam/KNR

Ajunaarnersuaqarnerani iliuusissanik Sisimiuni ullumi sungiusalersut

Qeqqani Politiit, upalungaarsimasullu Peqqinnissaqarfillu ajunaarnersuaqartittuusaarlugu Sisimiuni ullumi sungiusarnersuaqassapput, sungiusarnerlu ualeru nalunaaqutaq pingasunut aallartissaaq.

Kalaallit Nunaanni Teknikkimik Ilinniarfimmi, KTI-mi, ilinniartut 100-t misssaat sungiusarnermi peqataassapput, ajunaarnersuaqarnerani eqqorneqarsimasutut peqataassallutik.

Sisimiut mittarfianni KTI-milu sungiusartoqassaaq, ikuallattoqartittuusaarlugu ilaatigut sungiusartoqassalluni.

- Upalungaarsimaniarnermi misilittakkatta attatiinnarneqarnissaat uagut oqartussatut pingaartipparput, ajutoorujussuartoqarsimatillugu ajunaarnersuaqartilluguluunniit iliuuserisassatta ilisimanissaat pingaaruteqarluni, ajunaarnersuaqartillugu suligasuarsinnaanissarput piareersimaffigiuassallutigu, Qeqqani Politiit aqutsisuat Johan Davidsen oqarpoq.

Ajunaarnersuaqartillugu politiit upalungaarsimallu suleqatigiinnikkut iliuuserisassaat, matumanilu pingaartumik qanoq sukkatigisumik suligasuartoqarsinnaanersoq sungiusarneqassalluni, Johan Davidsen oqarpoq.

Ambulancit, politiillu biilii qatserisartullu upalungaarsimasullu biilii sumiiffiit Sisimiuni sungiusarfigineqartussat akornanni sungiusartoqarnerata nalaani angallannissaat oqartussat naatsorsuutigaat, tassa KTI-p, peqqinnissaqarfiup mittarfiullu akornanni angallattoqangaatsiassalluni.

Tassa imaappoq: Sungiusarneq ualeru nalunaaqutaq pingasunut aallartissaaq, akunnerillu tulliit marluk pingasulluunniit sungiusartoqassalluni.

Sisimiuni innuttaasut siggartaatit kalerrisaarutit ualeru tusaagunikkit taamaammat ernumassanngillat, Qeqqani Politiit oqaatigaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat