ASSIT Ajunaarnersuaqarnerani iliuusissanik Sisimiuni sungiusarneq ingerlalluartoq

Air Greenlandip Sisimiuni ajutoorsimanera ippassaq kalerriutigineqarmat illoqarfimmi quarsaartoqarpoq.

Allattoq Karsten Sommer

apriilip 28-at 2016 07:22

Nutserisoq Simon Uldum -

Timmisartup DASH 8-p motoorimi aappaa katappaa, taannalu ilinniarfimmut KTI-mut nakkarpoq ilinniarfillu ikuallalerluni. Timmisartoq kinguninngua Sisimiut mittarfiani nakkarpoq.

Qujanartumilli ilinniarfiup KTI-p pisortaata Jokum Møllerip kinguninngua nalunaarutigaa, nutaarsiassaq quarsaarnartoq ajunaarnersuaqarnerani iliuusissanik sungiusarnerusoq illoqarfillu tamarmi tamatumunnga peqataatinneqartoq.

Aamma atuaruk Ajunaarnersuaqarnerani iliuusissanik Sisimiuni ullumi sungiusalersut

Ilinniartuunngorniarfimmi HTX-imi, Sanaartornermik Ilinniarfimmi, Aatsitassalerinermik Ilinniarfimmi Artekimilu ilinniartut 72-it sungiusarnermut peqataapput. Ilaat toqungasuusaartut, ikiligaarujussuarsimasut ikilertitilaarsimasullu. Tamarmillu aanaartittuusaarlugit taninneqarsimasut, KTI-meersoq Tove Madsen tusagassiorfinnut nalunaaruteqarluni taama allappoq.

Qatserisartut biilii ambulancellu ulapittupilussuupput illoqarfimmilu qimmit malittuinnaq miaggoorput.

Ilinniarfiulli pisortaata Jokum Møllerip nuannaarutigalugu nalunaarutigaa, ajunaarnersuaqarnerani iliuusissanik sungiusarneq ingerlalluartoq aammalu sungiusarneriinnaanera Sisimiormiut tamarmik nuannaarutigigaat.