Ajunaarnersuaq pillugu suli iluamik tusarliisoqanngilaq

Nuna sajummat richterip uuttuutaa malillugu minnerpaamik 8-mik sakkortussuseqarsimavoq, tassa suna tamaat aseruatitersinnaasimagaluarlugu, qujanartumilli immap iluani sajunneq pisimavoq. Qeqertarpassuilli eqqugaapput tamakkulu ilaat suli qanoq aseruatiteriffiutigisimanersut tusarfigineqarsimanatik. Nalunngilarput qeqertaq Tonga eqqugaasimasoq, tassannali tusakkat amerikamiut nakkutigisaaneersuusut oqaatigineqarpoq.

Susi Loli akunnittarfimmi danskinit pigineqartumi sulisuusoq oqarpoq, nuna sajulermat akunnittarfimmi inissisimasuutitik tuaviortumik aniatipallassimagaat.

Inissisimasuvut aniatipallannissaat kisimi eqqarsaatinniissimavoq, ingerlaannarlu qutsinnerusumut qimarngussuussimallutigit, ajoraluartumilli inuit allat qimaanissartik angumerinngitsoorsimavaat.

- Maannakkut suna tamarmi avanngunarluinnarpoq, qeqertap kujataata kangiatungaani aseruatiternerit ingasalluinnarput, ilaatigut illut, akunnittarfiit aqqusernillu piuneerussaasimallutik, aamma ilisarisimasakka ilaqutariit sisamat tamarluinnarmik ajunaarsimasut maanna nalujunnaarpara.

Samoami amerikamiunit nakkutigineqartumiittumi iniut 20-it ajunaarsimasut nassaarineqarsimapput, qeqertallu taassuma ilaani namminersortumi inuit 65-it ajunaarsimanerangaallutik. Qeqertami Tongami maannamut arfinillit ajunaarsimasutut nalunaarutigineqareerput, tassanngali tusarliunneqarsinnaasut suli ilaannakuusorujussuupput.