Ajunaarneq nunatsinni pisimappat ajornerussagaluarpoq
Costa Concordia umiummat 4.200-nik ilaasoqarpoq 1.000-nillu inuttaqarluni. Ajunaarsimasut aqqanillit nassaarineqarsimalerput 22-llu suli maqaasineqarlutik.
Costa Concordia umiummat akullersuup imartaani silaannartaanilu kialaartumi pivoq. Kalaallit Nunaata imartaani umiusimasuuppat ajornerujussuarmik pisoqarsimassagaluarpoq, Christian Breinholt Naalagaaffiup Imarsiornermut qullersaqarfianeersoq oqarpoq, nangillunilu
- Qeqertarsuup tunuani umiusimasuuppat pissutsit allaanerujussuussagaluarput. Tassa imarsiortutut eqqarsaatigissagaanni ernumassutissaqarluarpugut.
Ukioq 2009-mi Danmark, ilaasartaassuarnut Kalaallit Nunaata imartaani angalaniartunut maleruagassaliorpoq, maleruagassalli ilaasartaassuarnut Kalaallit Nunaannut imartatsinnilu angallanniartunut kisimik atuupput.
Maleruagassiani ilaatigut umiarsuarni aquttarfimmiut immikkut ilinniagaqarsimanissaat piumasaqaataavoq, immartallu iluamik uuttortarneqarsimanngitsuni angalasoqaqqusaanngilaq, iluliarsuillu ungavarsimanissaanik maleruagassiani piumasaqaatigineqarluni.
Nunat tamalaat imarsiornermik inatsisaata allanngortinneqarnissaannut qallunaat utaqqisinnaajunnaaramik immikkut maleruagassaliortoqarpoq.
Maleruagassat saniatigut Nunat tamalaat imarsiornermut kattuffissuanni ilaasortaaterpaaluit qallunaat akuuffigisaanik isumannaallisaanermut sukaterinissamik piumasaqartoqarnialerpoq, soorlu ilaatigut umiarsuit marlukkaarlutik ingerlaaqatigiittarnissaanik piumasaqaateqartoqalissalluni, assersuutigalugu umiarsuaq umiussagaluarpat ingiaqataata ikiorsinnaaniassangamiuk. Tamatuma saniatigut umiarsuit sikusiutitut atorsinnaasutut allagartaqarnissaat, annanniutit matulluarsinnaasut aamma sikusiortilluni seqersaassuit umiarsuarniinnissaat piumasaqaataalissalluni.
Immikkut piumasaqaatissat polarkode-mik taagorneqartut ukioq manna akuerineqassappata aappaagu atuutilissapput.
Imaani isumannaallisaaneq assortuussutaaleruttortoq ilaasartaassuarni inuttaasut aamma qassiiliutaalerput.
Umiusoqartillugumi ilaasut nunanit assigiinngitsuneertuusarmata inuttat tuluttut paasinarluartumik oqalussinnaanissaat pingaaruteqartuartuummat Nunat tamalaat imarsiornermut kattuffissuaniit piumasaqaataavoq.
Inuttat amerlanersaat ilinniarluarsimasuuneq ajorput, akissarsialuttuusarlutik tamatigullu nunat ineriartorfiusuneersuusarlutik.
Inuttat ilarpassui allamiut oqaasiinut pikkoriffigisaqarneq ajorput, ilami 1.200 Euro-narnik imaluunniit 6.000 koruuniinarnik akiliilluni sapaatit akunneri marluk umiarsuarluni angalaarniaraanni inuttanut piumasaqaatit pitsaanerusinnaanngillat, Henrik Berlau, Danmarkimi umiartortut kattuffissuaneersoq taama oqaluttuarpoq.
- EU-p umiarsuarni inuttanut maleruagassai malillugit
Takornariartaatini inuttat ukioq ataaseq ataavartumik aamma sapaatit akunneranut nalunaaquttap akunnerini 96-ini sulititaasinnaanerat EU-miit akuerineqarnikuuvoq. Tassa ullormut sivikinnerpaamik nalunaaquttap akunnerini 14-ni ilaasorpassuit inuttat sullittarpaat, taamaammat ajutoortoqarujussuartillugu inuttat immikkut iliuuseqartarnissaanik piumasaqarneq inissaqartinneqanngilaq. Tamannalu ulorianarluinnartuuvoq, Henrik Berlau naggasiivoq.
