Ajunaarneq alianartoq Uummannami

Ilaasartaat "Inuk II", 40 fodsiusoq Ilulissanut iluarsaatitikkiartorluni ingerlaarnermi ikkarlippoq.

Motorip aappaa aseroqqavoq, ilisimagineqarporlu ilaasartaatip naalagaa angallat ikkarlummit kaanngartinniarlugu tunuporsorniartillugu imaanut nakkartoorsimassasoq.

Issimasut sinneruttut, inuttaq 18-inik ukiulik ilaasorlu 25-nik ukiulik tamarmik imarsiornermik ilinniarsimasuunngitsut ajornartorsiornermi radiokkut kalerrisaarissummik pan-pan-imik nalunaaruteqarpoq.

Angallat ikkarlummit kaanngarteriarlugu nakkartumik ujaasinertik nangippaat, kinguneqanngitsumik.

Kingusinnerulaakkut peqquneqarnertik malillugu ilaasartaat Saqqap tungaanut ingerlappaat, tassani angalasartutoqqamit Qeqertameersumit naapigiarneqassallutik.

Politiit kalerrisaarut tigugamikku erngerlutik sukkasuuliaq Targa Uummannamiit aallartippaat, Ilulissaniittorlu politiit angallataat Sisak 4 naalakkap nakkarfianut ujaasitikkiartorlugu.

- Nalunaaquttap akunnerpassuini imaani ikkarloqaqisumi qaammarmallu qulimiguulimmik nuna 100 kilometerimik isorartussusilik ujaasiffigigaluarparput, kisianni 57-inik ukiulik nanniveqanngilaq., Angutip imaani taama nillertigisumi uumaannarsimanissaa ilimanarunnaartutut nalilerlugu ujaasineq ippassaq sapaammi nalunaaqutaq 12:40 unitsinneqarpoq.

Ilaqutaasut nalunaarfigineqareerput. Taama Uummannami politeeqarfiup ulluinnarni aqutsisua Taitsiaq Heilmann.