Ajunaalertut qatserisartunut sianertassanngillat
-Taava massakkut imatut ingerlaniarsarivunga, uani hjemmestyreungallarmat inatsisiliaasimasut erseqqissaavigineqassasut taavalu taakku malinneqassasut aamma, tassa Politiit pisussaaffigivaat illoqarfiup avataani annaassiniarnermut tunngatillugu tassani politiit pisussaapput annaassininiartussaallutik, Qeqqata kommuniani sillimaniarnermut pisortap Jørgen Berthelsenip Angallammi Kimmersuarmi inuttat qatserisartut ikiuiniarsimannginnerannut naammagittaallioreersullu taama oqarpoq.
Angallammi Kimmersuarmi inuttat Sisimiut eqqaanni sapaatip akunnerata siuliani umiarsuup kivilernerani mobiltelefonit atorlugit 112 attavigaat. Umiarsuaq kivilermat inuttat qatserisartunut ikioqqugaluarput.
Angallammi VHF-radio attaveerummat mobiltelefonit kisimik atorneqarlutik qatserisartut attavigineqarput. Ikiuuttussanilli takkuttoqanngilaq.
Sisimiunilu qatserisartut ikiuiniarsimanngimmata naammagittaalliuutigineqarput. Tamannali qatserisartut suleriaasaannik allannguissanngilaq, erseqqissaavigineqassasulli, Jørgen Berthelsen oqarpoq.
-Ajoraluartumik taanna pisimasoq allanngortinneqarsinnaannginnami aamma inunnik ataasiakkaannik uparuartuerusunnginnama, umiarsuup naalagaanik aamma Sisimiuni qatserisartut uparuartorusunngilakka, innersuutigiinnarlugu una malittarisassat saqqummiuteqqinneqarnissaat erseqqissaassutigineqarnissaalu, Jørgen Berthelsen oqarpoq tamannalu politiit suleqatigalugit suliarineqassaaq.
Qatserisartullu siunissami taamatut pisimasumut assigusumik attavigineqassappata, Politiit piaartumik attavigissassavaat.
-Assersuutigalugu radiokkut attaveqarsinnaanngippata, taavalu mobil signaleqassappat politiit piaarnerpaamik attavigineqarnissaat siunnersuutigissavakka.
Taakku sukkanerusumik iliuuseqarsinnaammata taavalu periusissatik nalunnginnamikkit, Jørgen Bethelsen oqarpoq.