Ajugaasutut imminut suaarutigivoq

Parti talerperliuniaq, Radikale Parti, Serbiami ippassaq qinersinermi ajugaasuulluni ullumi imminut suaarutigivoq, kisianni qinigaatitarpassui partip naalakkersuisunik pilersitsinissaanut naammannavianngillat.

Naalakkersuisooqatigiinnik pilersitsisoqarnissaa ilimanarneruvoq, taamaalillunilu europamiunut ilaanissamik nunap kissaatai ingerlateqqinneqassagunarlutik.

Missingersuinerit naapertorlugit sapaatiummat qinersinermi Serbiens Radikale Partip 28,7 procentinik qinerneqarsimanissaa ilimagineqarpoq. Partip siulittaasoraa sorsunnermi ajortuliorsimasutut unnerluutigineqartoq, Vojislav Seselj, Haagimi parnaarussivimmi tigummineqartoq.

Europamut ilanngunnissamik illersuisoq, Demokratiske Parti, normu 2-nngorpoq, 22,9 procentinik qinerneqarlutik, tulliupput Serbiens Demokratiske Parti, 16,7 procentinik qinerneqartut, ministeriunermit inuiaassutsimik pingaartitsisumit, ingasattajaartuunngitsumit, Vojislav Kostunica-mit, siulersorneqartut.

Qinersineq toqoreersup Slobodan Milosevic-ip Socialistiske Parti-anut kingumut ajorsarneruvoq, taakkumi taamaallaat 6 procentimik qinerneqarput.

Partit arlaannaalluunniit amerlanerussuteqanngimmat Kostunica qitiusumik inissisimaleqqissinnaavoq.