Ajornartorsiutillit Juullimi naalliuuteqartarput
-Tassa ilumoorluinnassaaq, Juullip nalaa misigissutsikkut inuppassuarnut aamma attuisarami, aamma taarlunilu qiianartarpoq, William Kriegel oqarpoq, nangillunilu:
-Juullip tungaanut ulapaarfiusarpoq, angumeriniagassarpassuit, taavalu aamma aningaasartuuteqarnartorujussuusarpoq, tassami kissaaterpassuaqartarput immaqalu aamma aningaasanik naammattusaarineq ajornakusoortarsinnaalluni. Misigissutsit tungaasigut allatullu ajornartorsiutillit ikiorneqarnissamik soorunami pisariqartitsisarput, tamanna qularutissaanngilaq, William Kriegel oqarpoq.
Pisortat suliffeqarfiutaasa nalliuttuni matoqqasarnerat qanoq isumaqarfigineraaa apeqqutigigatsigu oqarpoq, taanna ajornartorsiutaasinnaasoq, kisiannili ajornartuuittunut saaffiginninnissaq periarfissaqartarnerarpaa, ornittagaasinnaasulli nalliuttuni matoqqasarnerat aamma paasinarnerarpaa, sulisummi ilaquttatik ilagalugit soorunami aamma juullisiorusuttarmata. William Kriegel nangilluni oqarpoq, namminneq kajumissutsiminnik ikiuerusuttut amerliartornerat soorunalimi nuannaarutissaasoq, tassali inoqarnerarpaa juullikkunni artorsaateqartartunik.
