Ajornartorsiulernermi siunnersuisartut amigaataapput
Nunatsinni politikkikkut ajornartorsiulernermi aalajangersimasumik periaaseqarlutik sulisartussanik upalungaarsimatitanik immikkut peqanngilagut. Tamanna pissutigalugu kingunissaa eqqarsaatigilluaqqaarnagu Kalaallit Nunaanni naalakkersuisut puisit amiinik Canadameersunik Great Greenland tassanngaannaq piseqqujunnaarpaat. Danmarkimi niuernermut højskolimi inuussutissarsiornermut kulturimut suliffeqarfinnillu ingerlatsinermut ilisimatooq Lise Lyck taama naliliivoq.
- Uivitsalluni iliuuseqarnertut isikkoqarpoq. Tamanna Kalaallit Nunaata nunatut siuarsimasutut ingerlalluartutullu, kiisalu avataanut kusanartumik kiinnertartutut isigineqarnissaanik anguniagaqarnermik tunngaveqarpoq. Puisit amiinut tunngatillugu kingunissai eqqarsaatigilluaqqaarnagit Kalaallit Nunaanni naalakkersuisut uivitsattutut periuseqarlutik Canadamit amersisarneq unitsitsipallappaat, puisi tunngavigalugu inuussutissarsiuteqarneq sooruna illersoramikku, Lise Lyck naliliivoq.
Lise Lyckip tikkuarpaa politikkikkut ajornartorsiulernermi, imaluunniit naalakkersuinermut sunniuteqartumik pisoqariataartoqartillugu, aalajangersimasumik periaaseqarluni upalungaarsimanissamut nunatsinni naalakkersuinikkut suliniuteqartoqannginneranik, naalakkersuisut kingullertigut iliornerat peqquteqartoq.
- Nunani assigiinngitsorpassuarni politikkikkut suliffeqarfippassuarnilumi avammut tunisassiaqartuni ajornartorsiulernermi suliniapallattussamik upalungaarsimatitsisoqartarpoq, avammut kiinnap innarlinnginnissaa eqqarsaatigalugu. Politikkikkullu ajornartorsiulernermi taama upalungaarsimatillugit sulisitat suliassaraat ajornartorsiutinik pilersinnaasunik qanoq isilluni pitsaanerpaamik aaqqiinissamut siunnersuisarnerit, Lise Lyck oqarpoq.
- Nalunngilarput puisinut tunngatillugu ajornartorsiutinik assigiinngitsunik takkuttoqartuartoq, taamaattoqartillugulu qanoq oqariartuuteqarnissap inisseqqaarnissaa pingaaruteqarpoq, uivitsassimarpaluttumik iliornissaq pingitsuussagaanni. Lise Lyck erseqqissaavoq. Nunatsinni taama upalungaarsimasoqartitsinissatsinnut nunatta nunanut allanut naleqqiulluni qanoq inuttutiginera annertutigineralu apeqqutaanngitsoq avammulli tunisassiornerput apeqqutaaqataalluinnartoq, Lise Lyck oqarpoq.
