Aanngu Themothæussenip illuatugneriit isummaminnik allangnortitsillutik suliumajunnaartoqarnissaanik pinngitsoortitsinissaat neriuutigaa.Assi: KNR

Ajorlunilu imminuinnaq eqqarsaatigineruvoq: Ilinniartut Air Greenlandip juullimut suliumajunnaarniarnera kamaatigaat

Ilinniartut arlallit Air Greenlandimi saqisut decembarip aappaani suliumajunnaassappata Sisimiunit aallarneq ajulissapput.

Juulli angallaffiulluartarput. Amerlasuut angerlassapput imaluunniit nunatsinni sumiiffinnut allanut Danmarkimulluunniit angalassapput. Amerlasuulli ukioq manna angalanissaminnut neriuuteqarluartut eqqugaanerlussinnaapput.

Air Greenlandimi Timmisartumilu Sulisut Kattuffiat (FPU) nutaamik isumaqatigiissuteqarsinnaanngippata Air Greenlandimi saqisut decembarip aappaanit suliumajunnaarsinnaanermik aarlerisaaruteqarput.

AAMMA ATUARUK Andet strejkevarsel er sendt til Air Greenland - men parterne skal nu i forhandling

Tamannalu Sisimiuni KTI-mi ilinniartut juullimut angalasussat ernumassutigaat.

 

Mati Lybert 22-nik ukiulik Tasiilamut juullisioriartortussaavoq.

Taanna qalipaasunngornialeqqammerpoq, taassumalu suliumajunnaartoqarsinnaanera tusaramiuk tamanna pakatsissutigaa.

- Uggornaqaaq soorunami. Neriukkaluarpunga juulliliarsinnaassallunga. Juullilianngikkuma aatsaat siullermeerlunga ilaquttakka angajoqqaakka juullisioqatiginngitsuussavakka ukioq manna, ukiut tamaasa juullisioqatigisarpakka.

Mati Lybert Tasiilamukarsinnaanngikkuni Sisimiuni kisimiilluni juullisiortariaqassaaq.

- Juullisiorianngitsuussagaluaruma kollegiani juullisortariaqassaanga. Tamaani Sisimiuni ilaqutaqarnanga. Uggornarpaloqaaq juullisioriassanngikkuma.

 

Aanngu Themothæussen Aasiannut juulliartussaavoq. 

Suliumajunnaartoqarniarnera taassuma pakatsissutigaa.

- Tupappunga, ingasappallaarsorivara. Amerlasoorpassuit nunatsinni ilai Danmarkiminngaanniit ilaquttatik ilagiartortussaavaat. Taava imaassinnaasoq, inuuneq nalunarpoq ilaa…imaassinnaasoq naggammik ilagileraat ilatik, Aanngu Themothæussen oqarpoq.

Juullimi tassunga pingaaruteqarpoq.

- Imminuinnaq eqqarsaatiginerugami. Isummatik allanngortissagaat, inuit allat eqqarsaatigalugit.

Air Greenland aamma FPU Isumaqatigiissitsiniartarfimmut ullumi aggersarneqarput. Taakku isumaqatigiissuteqarsinnaagunik suliumajunnaarniarneq taamaatiinnarneqassaaq.

 

Bodil Olsen KTI-mi allaffimmi aqutsisuuvoq.

KTI-mi ilinniartut arlallit juullimut angalasussaapput, suliumajunnaartoqassappallu KTI-p allaffiani ulapputtoqassaaq.

Tallimanngornermit suliumajunnaarneq - immaqa

Timmisartuutileqatigiiffimmi sulisut kattuffiat FPU aamma Air Greenland nutaamik isumaqatigiissuteqarniarlutik ullumi naapipput.

Isumaqatigiinniarnerat tallimanngorneq decembarip ulluisa aallaqqaataat nallertinnagu iluatsinngippat timmisartumi saqisut suliumajunnaassapput.

Kingullermik poorskinngitsiartoq suliumajunnaartoqarnissaanik aarlerisaaruteqartoqarnikuuvoq. Tamannali aallartitsinngitsorluunniit taamaatinneqarpoq. Dansk Metalimi Air Greenlandilu Københavnimi isumaqatigiissitsiniartarfimmi apriilip ulluisa aallaqqaataani isumaqatigiissuteqarput, isumaqatigiissullu nutaaq sananeqarluni.

Illuatungeriit nutaamik isumaqatigiissuteqarnissamut ulloq ilivitsuunngitsorluunniit Isumaqatigiissitsiniartarfimmi issiapput.

- Soorunami ulapaassaagut, arlaatigut billetsit utertissinnaanissaat periarfissinneqarutta aamma suliareqqittussaavagut. Nutaanillu aamma bestilliissutassaappata imaluunniit afbestilligassaassappata uagutsinnut suliaq annertulaassaaq, 30-it tungaanut inniminniissunnikuugatsigit, KTI-p allaffiani aqutsisoq, Bodil Olsen oqarpoq.

2022-mi decembarip aappaata decembarillu 16-iata akornanni angalasussaaguit billetsissavit utertinnissaa maanna utertissinnaalereerpat aamma naak suliumajunnaartoqassanngikkaluarpalluunniit, Air Greenland tusagassiuutinut nalunaarummi allappoq.

AAMMA ATUARUK Hvis Air Greenlands personale strejker, kan du refunderet din billet

Billetsissat aamma allanngortissinnaavat. Angalanissat ullormut allamut nuutsinniarukk Air Greenlandip nittartagaanut isissaatit. Kisianni angalatitsivik alla aqqutigalugu pisinikuusimaguit taava taakku attavigissavatit.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl