Ajoriinnagassaanngilaq

Air Greenlandimi angallannermik suliaqartut, angallattunik sullissisut aamma nassiussalerisut ukiunut pingasunut tulliuttunut akissarsiatigut qaffaaffigineqarnertik kissaatigisatik angunngikkaluarlugit naammagaat.
Allattoq Najaaraq Egede
februaarip 04-at 2011 05:46

Air Greenlandip aamma HK Luftfart-ip isumaqatigiinniarnertik februaarip pingajuani ukiunut pingasunut atuuttussamik isumaqatigiissuteqarlutik naammassivaat.

Isumaqatigiissuteqarneq sulisunut 65-nut angallannermik suliaqartunut, angallattunik sullissisunut aammalu nassiussalerisunut ukiut pingasut tulliuttut akissarsiatigut qaffaaffigineqarnermik nassataqarpoq, massakkullu ullumikkut atorfeqareersunut atukkat ajornerulinnginnissaat.

- Kissaatigisagut angunngilagut, aappaatigulli tamakkiisumik isigalugu aamma ajoriinnagassaanngilaq, Nicolas Fischer, HK Luftfart-imit isumaqatigiinniartunut pisortaasoq oqarpoq.

Air Greenlandimit aamma isumaqatigiinniarneq isumaqatigiissutillu imarisai naammagisimaarneqarput.

- Misigisimavugut Air Greenlandip massakkut immikkut inissisimanera paasinnittumik tiguneqarsimasoq, Air Greenlandimit isumaqatigiinniartunut pisortaasoq oqarpoq. Unammillerneqarluta inissisimanitsinni eqaatsumik suleriuseqarnissaq pisariaqartitarput anguarput.

Maannakkullu isumaqatigiissut HK Luftfartip Air Greenlandimi ilaasortaanit akuerineqarnissaa siunertaralugu taasissutigineqassaaq.