Ajoqit akissarsiaat appariangaatsiarput

Tassa ajoqitut imaluunniit organistitut akissarsiatik sorliit akissarsiariinnassanerlugit biskoppeqarfimmit toqqagassinneqaramik. Tamannalu ajoqit peqatigiiffiannut naammagittaalliuutigineqartoq, siulittaasoq Ado Jensen oqarpoq.

- Ulluni makkunani naammagittaalliuutinik takuttoqallattaartuarpoq. Ajoqit pattattuujutigisut qaammammut akissarsiaat sipaarnuitigineqartorpassuarnut allanut ilanngullugit peerneqarsimagamik, taamaalillutik pattannermut akissarsiaarullutik, Ado Jensen oqarpoq.

Taanna ajoqinit arfinilinnit naammagittaalliortunit maannamut saaffigineqareersimalluni oqarpoq.

Ajoqit katillugit 15-it missaannik amerlassuseqartut naalagiartitsinerminni organistiusartut Ado Jensen missiliorpoq, taakkualu akissarsiaat appariartussanngorput.

- Qaammammut akissarsiaat eqqarsaatigalugu nikingassut 5.000 koruunit missanniippoq, Ado Jensen oqarpoq.

Ajoqit ullup affaanik sulisartutut akissarsiaqartinneqartartut, Ado Jensen nassuiaavoq. Ajoqit aamma organistitut sulisinnaappata ulloq naallugu sulisartutut akissarsiaqartinneqarnissaat siunertarineqarsimavoq.

- Taanna anguniartuarsimavarput. Ajoqit pattattuujutigigunik taava iluittumik qaammammut akissarsiaqalersinnaammata. Ataasiakkaammi taanna angugaluarpaat. Una ukioq aallarnerfigalugu pattattussanik ilinniartitsinerit aallarteqqittussaapput. Soorunami neriuutigaara uumap pituttuinerup tamanna ajoqusissanngikkaa, Ado Jensen oqarpoq.

Ajoqit organistitut aamma akissarsiaqartinneqartarnerat maanna unitsinneqartoq, Ajoqit peqatigiiffiannit pissusissamisoorsorineqanngilaq.