Assi: Kommuneqarfik Sermersooq

Ajoqersuiartortitat inerteqqutigisimasaat nunarsuarmi kingornussatut inissinneqarneq: Qilaatersorneq kulturikkut kingornussatut asseqanngitsutut UNESCO-miit naqissuserneqarpoq

Danmarkip Qilaatersortarneq UNESCO-p nunarsuarmi kulturikkut kingornussat tigussaanngitsut allattuiffiannut ullumi ilanngutitippaa.

Kulturikkut kingornussanut tunngatillugu ullumikkut ulloq nunatsinnut angisuujuvoq.

Ullumikkummi UNESCO aalajangerpoq qilaatersortarneq nunarsuarmi inuiassuarnut inuiaqatigiiussutsimullu pingaaruteqaqisutut kulturikkut kingornussat tigussaanngitsut allattuiffiannut ilanngunneqassasoq,

AAMMA ATUARUK Qilaatersorneq nunarsuarmiunut eriagisassanngortinniarneqartoq

Allattuiffillu taanna isumaqarpoq, kulturi pineqaraangat eqqaassutissanut, qalipakkanut attorsinnaasanulluunniit allanut taamaallaat attuumassuteqartuunngimmat.

Kulturilu aamma tassaammat inunnit aallunneqaraangami aamma uumassuseqarsinnaasoq.

Assersuutigalugu soorlu allattugaatigineqartut makkuupput; Georgiemi erinarsoqatigiit, Elfebenip sineriaani qarlortaammik nipilersoqatigiit, Frankrigemi mamasaakkanik nerisassiortaaseq, Spaniami flamencomik qitinneq, taavalu maanna nunatsinni qilaatersorneq.

Naalanngitsup inaaniititaanerata ukiorpassuarni atorunnaarnikup uummaqqinnera

Nunatta katersugaasiviata tusagassiutinut allakkiaminni erseqqissaatigivaat, nunatsinni qilaatersortarnerup nunarsuarmi allatuivimmut kulturikkut kingornussatut eriagisassatut inissinneqarnera tulluusimaarutissaallunilu nuannaarutissaasoq.

AAMMA ATUARUK Naalakkersuisut qilaatersortarneq nunarsuarmiunut kingornutassanngortinniaraat

Maluginiarsimavaattaaq naalagaaffeqatigiinnerup iluani nunarput siullersaalluni kulturikkut kingornussat tigussaanngitsut akornannut inissinneqaqqaartuummat.

- Tamanna ersinngitsup piumasaatut oqaatigisariaqarnerpoq, tassami ukioq manna 2021 tassaavoq ukiut 300-it matuma siornatigut kristumiuussutsip eqqunneqarneraniit qilaatersornerup akiorneqarluni nunatta kitaani tammariartulerluni nungutinneqarnerata aallartiffia, Nunatta katersugaasiviata pisortaa Daniel Thorleifsen allappoq.

Politikerip nuimasup qilaasortarneq unitsinniaraa

Qilaatersortarneq inngertarnerlu ukiorparujussuarni kinguaariinni kingornunneqartarpoq.

Teknikkikkut atortorissaatut atulerneranni, nipilersukkat immiunneqarsinnaalerput.

1977-mi nipilersukkanik saqqummersitsisarfik Ulo tunumi qilaatersortut immiunneqarput.

Kisianni kikkut tamarmik nuannaanngillat,

Taamaa oqaluttuarpoq Karsten Sommer 1970-ikkunni nipilersukkanik saqqummersitseqataasartoq,taamanilu tunumiut qilaatersortut saqqummersinneqarput.

- Taamani saqqummersinneqarmat politiikerit nuimasut ilaata sianerfigaatigut oqarlunilu: " Taamaaliortariaqanngilasi, puigunnagassaruna, Karsten Sommer oqarpoq. Tamatumalu kingorna imminnut piumaffigipput qilaat pillugu qanoq iliuuseqartariaqarlutik. Qilaat tassaavoq Kalaallit Nunaata nipaa, Karsten Sommer taama oqarpoq.

Kingornussaq kinguaaatsinnut ingerlateqqinneqartoq

Leif Sandvig Imanuelsen qilaatersortartuuvoq qilaatersortarnermillu ilinniartitsisarluni.

Taassuma qilaatersornerup UNESCO-p kulturikkut kingornussanut tigussaanngitsunut allattorsimaffiannut ilanngunneqarnera qilaatersornerup aalluttuaannarneqarnissaanut qulakkeerneqartoq taannalu ima oqarpoq:

- Siullermik inuiaqatikka pilluaqqorusuppakka eriagisariaqartunik aallussiniarnitsinni pingaaruteqarluinnartumik pisoqarnera pillugu.

-Eqqaamavakka inngertartorsuit qanganngoreersimalersut aalajaallutik kingornussisussanut aallussiuarsimasut, kinguaajusullu sulilluarnissaannik kissaallugit.

Unisco-mi tammatsaalisariaqartut allattorsimaffianni inissisimalernera kingulissagut eqqarsaatigalugit eqqissiallannarpoq, Leif Sandvig Immanuelsen taama oqarpoq.

Naalakkersuisut naapertorlugit nunarsuarmi issittoqarfiusuni nunarput kisiartaalluni UNESCO-p kulturikkut kingornussat tigussaanngitsut pillugit allattuiffiannut i ilanngunneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl