Airbus marlunngornermut kinguaattoorpoq

Air Greenlandip ullumi ataasinngornermi timmisartuussinissai nalunaarutigineqareersutut kinguaattoortut ajoraluartumik aatsaat aqagu ingerlanneqartussanngorlutik kinguaattoorfioqqipput, Air Greenlandimit taama nalunaarput.
Allattoq Najaaraq Egede
novembarip 02-at 2009 12:46

Air Greenlandip timmisartuata Airbus 330-200-p ”Norsap” teknikkikkut piareersarneqarata naammassineqarsinnaannginnera pissutaavoq, taamaattumillu Danmarkimut timmisartuussinissat tassungalu atatillugu nunatta iluani angallissinissat marlunngornermut kinguartinneqarput, Boeing 757 ”Kunuunnguaq” immikkut timmisartuussisussanngorlugu. Taannalu Danmarkimiit ataasinngornermi ilaasussat ilaasoralugit Københavnimiit nal. 12.00 aallassaaq. Timmisartuussinissamut tassunga nunatta iluaniit immikkut timmisartuussinissat naammassiumallugit ”Kunuunnguaq” aqagu Kangerlussuarmiit aatsaat nal. 21.25 aallassaaq.