Airbus immikkut angallassinermut atorneqarpoq

Assartugassat amerlanerit Thule Air Basemut nassiunneqarput, tamanna US Air Forcemik isumaqatigiissummik tunngaveqartoq, niuernerpalaartumik aqutsisoq Udo Glaschoff oqarpoq.

- Nassiussassat 26 tonsit Thule Air Basemut ullumi nassiunneqarput, taakkulu timmisartup mikinerusup, Boeingip, nassarsinnaanngilai, Udo Glaschoff oqarpoq.

Amerikamiunut isumaqatigiissut aalajangersimalluinnartuuvoq, taamaattumik timmisartuussisinnaanngilagut kinguartitsisinnaanatalu. Aamma timmisartortartut qaangiuttooqqusaannginnerat Kangerlussuarmut akunnissinnaannginnitsinnut peqqutaaqataavoq, Udo Glashcoff oqarpoq.

Timmisartut akunnittussaatillugit timmisartortartut sulisullu Kangerlussuarmut ulloq ataaseq sioqqullugu aallartarput, tamannalu timmisartoqqusaannginnerup pisinnaatissimanngikkaa, Udo Glashcoff nassuiaavoq.

Nuummiit Kangerlussuarmut ilaasussat siusinnerusukkut angallanneqarsimasinnaannginnerlutik?

- Kangerlussuarmi inissaqartitsineq naammanngimmat taamatut iliorsinnaasimanngilagut. Qaqugulu ingerlaqqissinnaanissaat aamma nalunarluni. Avannaaniit ilaasunik sapinngisarput tamaat massakkut timmisartuussivugut, Udo Glashcoff oqarpoq.

Kinguaattoornerit qaqugu angummaffiussanersut Air Greenlandimit suli eqqoriaruminaatsinneqarpoq.

- Tamanna maannangaaq oqaatigisinnaanngilarput - silaannaap arsakunik akullip qanoq nikerarnera tassungalu atasumik timmisartornissamut intereqquteqalersinnaanera apeqqutaavoq. Silaannartallu ammatinneqarnerani sapinngisarput tamaat timmisartut inuttallu atorsinnaasagut atorlugit timmisartuussissaagut, ullormiilli ullormut timmisartuussinissanut pilersaarutit nalilersorneqartartut Udo Glashcoff oqarpoq.

Danmarkimut angalaniarlutik utaqqisut 200-t Kangerlussuarmiit ullumi aallarsinnaasimapput, Nuummiillu ilaasussat suli utaqqigallassallutik.