Airbus Airbusimit taarserneqassaaq
Motoorip aseqqukup aaqqissuunnerani motoorimik allamik timmisartoq pilerneqartussaavoq, kisiannili motoorit Airbus 330-200-p atortagai nunarsuatsinni ikittuarakasiupput.
Air Greenlandip teknikeriisa nassaaraat motoori USA-mi Californiamiittoq. Taannalu immikkut timmisartuullugu Amsterdamimut nassiunneqarpoq. Tassani EU-p ilanngaaserisuinit misissorneqareerpat motoori lastbiilimik Københavniliaanneqassaaq, naatsorsuutigineqarluni tallimanngorpat apuussinnaassasoq.
Motoori Købanhavnimut apuuppat mekanikerit arfineq-marluk Schweizimi Zürichimeersut motoori ajortoq piissavaat nutaamillu taarserlugu, tamannalu pissaaq tallimanngornerup ingerlanerani.
Motoori ikkullugu iluatsissappat Norsaq ataasinngornermiit Kalaallit Nunaannut timmisaqqilersinnaassaaq.
Maannali Nunatsinnut timmisartoq alla ingerlaartarpoq, tassalu Portugaalimiut timmisartuutileqatigiivianit, Hi Fly-mit attartugaq Airbus. Taanna aqagu tallimanngorpallu Nunatsinnut ilaasunik timmisartuussissaaq.