Air Icelandimut isumaqatigiissut tapersersulerpaat
Air Icelandimut isumaqatigiissut aningaasaqarnermut ataatsimiititaliamit isorineqaqqaarsimagaluarpoq. Maannali ataatsimiititaliami amerlanerussuteqartut Inuit Ataqatigiit Demokraatillu ilaasortaatitaasa tapersersulerpaat.
Tamannalu ima paasineqarsinnaavoq tassa, sulinermut atatillugu angalanermut, napparsimasunik angallassinermut aammalu ilinniartunut pisortat akiligaannik angalaniartunut isumaqatigiissut taamaallaat atuutissalluni. Air Icelandimut isumaqatigiissut nalilersorneqartuartussatut Aningaasaqarnermut Ataatsimiititaliamit nalilerneqarpoq, ilaatigut Mittarfeqarfinnut Air Greenlandimullu isumaqatigiissutip kingunerluutaannginnissaa eqqumaffigineqassalluni.
Ukioq manna qaammatini siullerni marlunni, Air Icelandimut isumaqatigiissut atorlugu inuit 13-it maannamut angalasimapput.
- Taamaattumik isumaqatigiissut inuiaqatigiit aningaasaqarnerannut manna tikillugu taasarialimmik kinguneqarsimasoq oqaatigineqarsinnaanngilaq, Aningaasaqarnermut Ataatsimiititaliami amerlanerussuteqartut, siulittaasoq Olga P. Berthelsen siuttoralugu, taama tusagassiutinut nalunaaruteqarput.
Inatsisartut ukiakkut ataatsimiinnissaannut Naalakkersuisut Inatsisartunut neriorsuipput, pisortat pisiniarnermut politikkiat pillugu ukiamut nassuiaasoqarumaartoq. Nassuiarneqassallutik inuiaqatigiit pisariaqartitaat pingaarnerit, soorlu suliffeqarfiit isumaginninnikkut sulisunut tunngatillugu akisussaanerat aammalu Nunatsinni suliffissuaqarneq eqqarsaatigalugu sumut killittoqarsimanersoq nassuiarneqassalluni.
Aningaasaqarnermut Ataatsimiititaliami amerlanerussuteqartut oqaatigaat pisortat pisiniartarneranni allaffissornikkut periutsit paasisinneqarnissaat iluarisimaaritsik. Aammalu Namminersorlutik Oqartussat Air Greenlandillu oqaloqatigiillutik aallartissimaneri ataatsimiititaliami amerlanerussuteqartut iluarisimaarlugu allapput.
