Air Icelandimut isumaqatigiissut suli qassiiliutaavoq

Inatsisartuni ilaasortat Naalakkersuisunit tusaaniarneqanngitsutut misigisimapput.
Allattoq Noah Mølgaard
marsip 24-at 2011 10:51

Aningaasaqarnermut naalakkersuisunngorlaap Malina Abelsenip Air Icelandimut isumaqatigiissutip ingerlatiinnarnissaa ippassaq nalunaarutigaa. Aaliangiinerlu tamanna Inatsisartunit ilaasortanit Siumumeersunit aalassassimaarutigineqarpoq.
- Taamaattorli Inatsisartuni ilaasortat amerlanersaasa Radioaviisimit oqaloqatigineqartut Naalakkersuisut aaliangiinerat nalorninartoqartippaat.
- Tassa siumuminnggaannit tammatta isumaqataaffiginngilarput, siullermik taamatut iliuuseqarnissaq isumaqarpung Inatsisartunut ataqqinninnginnerusoq. Aamma inatsisartuni aningaasaqarnermut ataatsimiisitaliap piumasaanut malinnaannginnerusoq, Inatsisartuni ilaasortaq Doris Jakobsen oqarpoq.
Siumumeersut isumaqataannginnerminnut tunngavilersuutigaat inuiaqatigiit aningaasaataannik kingunerlutsitseratarsinnaanerat aamma Air Greenlandip sinerissap ilaanni akinik qaffaaratarsinnaanera ernumanartoqartikkamikku.
Maliina Abelsenip ippassaq nalunaaruteqarnermini ilanngullugu oqaatigaa, Air Icelandimut isumaqatigiissut aqqaneq-marloriaannarluni maannamut atorneqarsimammat inuiaqatigiit aningaasaqarnerannut sunniuteqangaarnavianngitsoq.
- Inuit aqqaneq-marluinnaat atorsimappassut atorsimanngikkaluarunikkuluunnit Naalakkersuisut inuiaqatigiinnut oqariartuutaat pingaartorujussuartut isigineqartariaqarpoq. Taamaammat taama pingaaruteqanngitsigippat sooq isumaqatigiissut attatiinnarniarsarissavaat? Aleqa Hammond Siumumeersoq aperaaq.
Radioaviisip inatsisartunik isumasiuinermini inatsisartuni ilaasortani 31-usuni 15-it oqaloqatigai taakkunanngalu isumaqatigiissummut isumaqataanatik oqaaseqartut arfineq-pingasuupput. Taakkunanngalu arfinillit Air Icelandimut isumaqatigiissummi iluaqutaasinnaasut ajoqutaasinnaasulluunniit paasisaqarfigeqqaarusuppaat.