Air Icelandimut isumaqatigiissut itigartippaat
Timmisartuussisarneq pillugu Naalakkersuisut Islandimiunut angalatitsisartunut akikillisaaffigineqarnissamik isumaqatigiissutaanni tunngavigineqartut Aningaasaqarnermut ataatsimiititaliap Naalakkersuisut siulittaasuannut Kuupik Kleistimut ullumi allakkaminni isornartorsiorpaat.
Aningaasaqarnermut ataatsimiititaliap Jens B. Frederiksen aamma Palle Christiansen februaarip arfineq aappaani isumaqatigiissut pillugu isumasioqatigai, naalakkersuisunilu ilaasortat taakku marluk nassuiaataat tunngavigalugit, Aningaasaqarnermut Ataatsimiititaliap Air Icelandimut isumaqatigiissut sakkortuumik isornartorsiorpaat.
Akikillisaavigineqarnissaq kisiat isiginagu inuiaqatigiinnilli ataatsimut isiginninneq aallaavigalugu isumaqatigiissutit isiginiarneqartariaqartut ataatsimiititaliaq isumaqarpoq. Tamatuma saniatigut tunngavilersuutit isumaqatigiissuteqarnermi tunngavittut atorneqartut naammanngitsut ataatsimiititaliaq isumaqarpoq. Taamaalillunilu ataatsimiititaliaq isumaqarpoq aningaasalersuinissamik EU-mut isumaqatigiissutip suliamut attuumassuteqarnera uppernarsisinneqanngitsoq, soorluttaaq isumaqatigiissutit qanoq sipaarutaatiginissaat pillugu naatsorsuinerit amigaataasut, Aningaasaqarnermut Ataatsimiititaliaq isumaqatigiilluni taama allappoq.
Taamaattumik ataatsimiititaliap Kuupik Kleistimut saaffiginnissummini Aningaasaqarnermut naalakkersuisup Palle Christiansenip suliamik aqutsinera uparuarpaat.
Taamaattumik aalajangiinissamut tunngavissap suliarilluagaanerusup suliarineqarnissaata tungaanut akikillisaaffigineqarnissamik isumaqatigiissutit atorunnaarsinneqarnissaat ataatsimiititaliamit Naalakkersuisunut kaammattuutigineqarpoq.
