Air Greenlandip unammillerneqarnini ajoriffissaqartinngilaa
Heli-Greenland marlunnik qulimiguulinnik timmisartuuteqarpoq, taakkulu canadamiut suliffeqarfiata Expedition Helicoptersip timmisartuutigai. Tamannarpiarlu pissutigalugu Michael Binzer isumaqarpoq, Heli-Greenland nunat allamiut ingerlatarigaat.
- Suliffeqarfimmit nunanit allamiunit pigineqartumit, nunatsinni silaannakkut angallanneq akuleruffigineqassappat, akileraarutitigut isertitassat nunatta karsiata annaasussaassavai. Tassami timmisartumik aquttut nunanut allanut akileraartussaassammata, Michael Binzerip oqarpoq.
Silaannakkut sullissineq nunanit allamiunit akuliuffigineqarpat, nunatsinni nunaqavissut suliffissaannik arsaartuinerussasoq, Michael Binzer isumaqarpoq.
Piginneqatigiiffiup namminersortup Heli-Greeenlandip, kuultisiorfik aamma zinkimik piiaaffik timmisartuuttarnissaanik isumaqatigiissuteqarfigereerpai. KNRip paasisai naapertorlugit, Heli-Greenland suliniuteqalereersimavoq aatsitassarsiorfiit arlaqartut timmisartuuttalernissaannik isumaqatigiissusiorfigissallugit. Tamannalu iluatsissappat, nunatsinnut ajornartorsiutaalissaaq annertooq, Michael Binzer isumaqarpoq.
- Taamaattoqalissappat, sullissinitta aaqqissuunneqarnera eqqarsaatigeqqittariaqalissavarput. Taamaaliortariaqalissaagut politikerit piumasarippassuk nunat allamiut timmisartuussisalissasut, nunaqavissut pinnatik, Michael Binzer naggasiivoq.
Suliffeqarfinnik timmisartuussinerup akissarsiutaanissaata saniatigut takornarianik timmisartuussisarnissaq Heli-Greeenlandip siunertaraa.
