- Soorunami tamatta nilliavugut, sakkortuvoq soorlu timmisartoq tammeqattaalersutut misinnarpoq. Tupannaq, Else Jeremiassen oqarpoq.Assi: KNR

Air Greenlandip timmisartuutaa minnerlungajalluni qangattaqqiinnartoq

Air Greenlandimi ilaasut ippassaq Nuummu unnukkut minniartillutik tupannartumik misigisaqarput, ilaasummi nilliarrassimasut ilaasut ilaat oqaluttuarpoq.

Dash-8-p Nuummut meriaraluarnera Facebookimi siammarterneqangaatsiartumi takuneqarsinnaavoq, timmisartup milernermini anoraamit eqqorneqarluni assakaasuata aappaannaa mittarfimmut attuukkaluarluni tammigussaapajaarluni qangattaqqiinnartoq.

Tamanna Air Greenlandip timmisartuutaanut Dash-8-mut ilaasumut Else Jeremiassenimut misigisaq tupannarsimaqaaq.

- Soorunami tamatta nilliavugut, sakkortuvoq soorlu timmisartoq tammeqattaalersutut misinnarpoq. Tupannaq. Tunnerluppugut kisianni torlorujussuanngilagut.



Video: Aqqalu Fontain

Anoraa takkuteriapiloortoq

Timmisartumi aquttup anoraap sammivinnit assigiinngitsunit takkuteriataarnera naatsorsuutigisimanngikkaluaraa, Air Greenlandimi attaveqaqatigiinnermut pisortap, Katja Vahlip nassuiaatigaa.

- Nuummi anorlingaatsiarami GL 513-imi piloteq Kangerlussuarmiit Nuummut ingerlaareerluni milernerani naatsorsuutiginngisaminik anoraa takkuteriataarpoq. Tamannalu minnani qangattaqqiinnarniarluni aalajangerneranik peqquteqarpoq, Air Greenlandip attaveqaqatigiinnermut pisortaat Katha Vahl oqarpoq.

- Timmisartup mittarfik assakaasuminik attupisukkaluarlugu ingerlaannaq qangattaqqippoq. Nuummi anoraa sakkortusiartormat timmisartoq Kangerlussuarmut utiinnarniarluni aalajangerpoq.

Ilaasut qanorippat?

- Ilaasut silaannakkoornerup nalaani paasitinneqarput Kangerlussuarmullu unnuiartorfissaminnut apuunneqareermata ilaasut tamarmik paasissutissanut tunngatillugu apeqqutilliisinnaanissaannik periarfissinneqarput. Ilaasut attaveqarfigineqallattaarput taakkulu nalaataminnut tunngatillugu eqqissisimaqaat.

Ilaasut pisup kingorna oqaloqateqarnissaminnik pisariqartitsippat?

- Ilaasut oqaluussagut nalaassimasartik pillugu ikiorneqarnissaminnik pisariaqartitsinngillat. Kisianni arajutsisimasatsinnik pisariaqartitsisoqassappat saaffiginninnissaannut tikilluaqqusaapput. Ilaasut taakku KAngerlussuarmi unnuiartortariaqarsimasut maanna Nuummut uterput, taakku utimut ingerlaarneranni  oqaloqateqarnissaannik toqqissisimanissaannik immikkut pisariaqartitsinersut maluginiarneqarput.

Else Jeremiassen Ilulissaninngaanniit Nuummut panimi allagartartaarnissaanut peqataajartorluni ippassaq unnukkut Nuummut tikittussaagaluarpoq.

Anoraalli sammivii allanngoraleriataarnerata kingorna timmisartoq minniarunnaarluni aalajangeriataarmat Kangerlussuarmut uterput.

- Kisianni Kangerlussuarmut uterluta meqqileratta annilaangalerpunga. Tassaniluunniit annilaanganeruvunga, misigisimallunga soorlulimi assakaasoq ajortissimassasoq minnissaq annilaanganarluni. Ujallukka sukaterujussuarlutik.

Else Jeremiassen annilaarsimagaluaqaluni timmisartumi aquttoq assut nersualaarpaa

- Aquttugut uanga assorujussuaq nersorpakka. aquttugut kalaalipajuit pikkorit. Paarilluarpaatigut, uanga taamatut naliliisinnaavunga. Tassami piniinnaratik uagut ilaasut eqqarsaatiginerulluta Kangerlussuarmut angerlaateqqippaatigut.

Timmisartumik aquttut singiusarnikuupput

Timmisartumili aquttut, nunatsinni silap allanngoriataarsinnaanera peqqutigalugu ukiumut marloriarlutik minniarunnaariataarnermik sungiusartartut, Air Greenlandimi timmisartumik aquttut pisortaat, Henrik Maule Steinbacher, KNR-imut oqarpoq.

- Timmisartumik aquttut suleriusaanut ilaavoq arlaannik sila peqqutaalluni pilersaarutaanngitsumik minniarunnaariataarneq. Tamannalu Nuummi sisamanngormat unnukkut nalanneqarpoq.

Videoliarineqarsimasoq Facebookikkut 1080-it missaannik siammarterneqarsimasoq takuinnarlugu timmisartup meriaraluarnera pissanganarpasikkaluarpoq. Kisianni aquttup pisortaata nassuiaanerani taama sakkortutiginngilaq.

- Timmisartoq sakkortuumik meriataartillugu atortorissaaruteqarpugut, minneq sakkortuallaaraangat teknikkeqarfimmut toqqaannartumik nalunaarummik apuuttartumik, taamaattoqassagaluarpat sulisut piareersimasut erngertumik ornigussinnaaniassammata.

- Kisianni ippassaq pisumut taamaattoqanngilaq, tassa minnerup sakkortussusaata tamanna killinngimmagu nalunaarut nammineq ikittartoq ikinngilaq, taamaammat taama sakkortutiginngilaq pisoq, Henrik Maule Steinbacher oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl