Air Greenlandip timmisartuussinera naammagiunnaaraat

Ilaasussat naammattumik ilisimatinneqartarsimanatik aamma isumaqarput. Qeqertarsualiartussallu, Andreas Christiansen Mads Pavia Brobergilu aamma taama misigisimapput.

Andreas Christiansen, aallariartoraluarnermi saniatigut allamik aamma misigisaqarnerluppoq, tassa timmisartuaraq Bell 212 Aasianni orsersoreermat orsersortarfia matuneqanngitsoorsimavoq.

- Orsersortarfik nipittartumik assipajuinnarlugu Qeqertarsuarmiit Ilulissiarsimasoq oqaatigineqarpoq, Andreas Christiansen e-mailikkut allappoq.

Taassuma siunnersuutigaa timmisartoq AS 350 Air Greenlandip atortassagaa, taanna sisamanik arfinilinnilluunniit issimasoqarsinnaavoq, aammali angallatinik angisuunik akuerisaasunik Air Greenland Ilulissani attartortarsinnaagaluartoq unnerpaa.

Mads Pavia Broberg ulluni qulini Qeqertarsuarmukarniarsarivoq. Timmisartussaa Nuummi siullermik ulluni pingasuni taamaatiinnarpoq, Ilulissanullu pigami sapaatip-akunnera aallarnaveerluni.

Air Greenlandimit ilisimatitsissutigineqarpoq Bell 212-ip teknikkikkut ajoquteqarnera ajornartorsiutaasimasoq, ajoqulli maanna iluarsineqareersoq.

- Ajornartorsiutit maanna iluarsineqareerput, ilaasussallu tamarmik aqagu aallarsinnaassapput, ilaat angallat attartugaq atorlugu ullumili aallareerput, allat qulimiguulimmik, immikkut aqagu aamma immisartuussisussamik, timmisartuunneqassapput, Air Greenlandimi attaveqaqatigiinnermut pisortaq, Pia Christensen Bang, oqarpoq, nangillunilu:

- Ilaasussat Qeqertarsuup Tunuani taamarsuaq ajornartorsiormata ajuusaarutigaarput, allatulli ajornarsimavoq, Pia Christensen Bang naggasiivoq.