Arctic Umiaq Linep tuniniarneqarneranut atatillugu Namminersornerullutik Oqartussat naapertuutinngitsumik pissusilersorsimasutut Air Greenlandip Royal Arctic Linellu allakkatigut ammasutigut isornartorsiorpai.
Danskit ingerlatseqatigiiffiat, Arctic Travel Group, Namminersornerullutik Oqartussat salliutinnerusimagaat kalaallillu suliffeqarfiutaat taakku marluk tuniniaanerup ingerlanerani allarluinnarmut sangutissimagaat suliffeqarfissuit taakku isumaqarput. Naak Arctic Umiaq Line Air Greenlandip Royal Arctic Linellu pisiarissallugu soqutiginnikkaluartut, taamaalillutik sinersortaatit sinerissamut angalasarnerat ingerlateqqissinnaalissallugu. Suliffeqarfiit taakku marluk sinnerlugit Air Greenland allappoq, tuniniaanerup ammasumik unammillernertut ingerlanneqarnissaa akuersaaritsik, paasisinnaanngilaalli Namminersornerullutik Oqartussat tassanngaannaq killormorluinnaq iliormata, tassa danskit ingerlatseqatigiiffiat angalatitsivik Arctic Travel Group tamakkiisumik tapersersorpaat, naak Air Greenland Royal Arctic Linelu nunatsinni angallannermik ilisimasaqarluartut neqeroorutinik pissarsiniarfigisinnaagaluarlugit.
Suliffeqarfiit taakku saaffiginnissutaat piffissaq kingullerpaaq atorlugu takkuppoq, neriuutigaalli tuniniaanerup ingerlanneqarnera iluamik ingerlalissasoq, Kalaallit Nunaanni umiarsuartigut angalanerup siunissaa akit naapertuuttut atorlugit naapertuuttumik ammasumillu ingerlanneqarsinnaaqqullugu.
