Air Greenlandip qulimiguulia orsussamik katatsisoq
Orsussaasivik qulimiguulimmit nivingasoq nakkarami imaanut tunnermini putusimavoq.
Air Greenlandip qulimiguuata Tele Greenlandip mobilikkut radiukullu attaveqarniarnermut napparuteqarfianut, orsussamik A1-imik taaguutilimmik Qingaamukaassisimagaluarpoq. Timmisartunut orsussaq, A1-imik taaguutilik, uuliamit oqinneruvoq aalannguutianerullunilu.
Nuummi qatserisartut angallammik ippassaq misissuiartorput orsussaasivillu qaqillugu. Qatserisartut pisortaata Knud Petersenip oqaasii malillugit ippassaq kangerlummi anorip sarfallu orsussaq kangerluup qinnguanut siaruartissimammagu qalloriarnissaa qatserisartunut akilersinnaasimanngilaq, aalannguunnissaalu utaqqiinnartariaqarluni.
Kangerlummi uumasunut qanoq sunniuteqarsinnaanera Pinngortitamut Avatangiisinullu pisortaqarfimmiit suli oqaatigineqarsinnaanngilaq, Pinngortitaleriffilli nalunaarusioqqullugu saaffigaat.
Mittarfimmi timmisartuussinernik aaqqissuussisartoq Wilhelm von Platen Air Greenlandimi atorfilik oqarpoq, qulimiguullip teknikikkut ajoquteqarneranik nassaarsimanatik, ilimagigitsilli qulimiguulimmi aquttup pappilissanik immersuitilluni orsussaasivik katatsittoorsimassagaa.
