Inuiaqatigiit akilersugassareqqippaat, angalasut akilersugassarivaat. Taamaammat uagut qatsupparput toqqorterluni taamatut inuiaqatigiinnut akiligassanik tunniussuineq, Pele Broberg oqarpoq.Assi: Partii Naleraq

Air Greenlandip pisiarinissaanut tunngasut Partii Naleqqap matoqqanerarlugit isornartorsiorai

Naalagaaffiup SAS-illu Air Greenlandimut piginneqataassutaat Naalakkersuisut pisiarerusuppaat, tamanna matoqqasumik ingerlanneqarpallaartoq Pele Brobergimit isornartorsiorneqarpoq. Tusarfiit malillugit Naalakkersuisut piginneqataassutit pisiarerusuppaat.

Partii Naleqqap inatsisartunut ilaasortaatitaata Pele Brobergip Namminersorlutik Oqartussat, Air Greenlandip piginneqataassutaanik naalagaaffimmiit SAS'imiillu pigineqartunik 461 milliuunit koruuninit nalilinnik pisiniarneq isornartorsiorpaa.  
- Suli innuttaasut aperineqanngillat ilissi tamakkiisumik una pigerusuppisiuk? aap naamilluunniit, immaqa tassanngaanniit aallartinnikuunngilangulluunniit, Pele Broberg KNR-imut oqarpoq.

Taassuma oqaatigaa piginneqataassutit pisiarinissaat akisuallaartoq, aammalu timmisartut qulimiguullillu nutaanngippallaartut.

AAMMA ATUARUK Namminersorlutik Oqartussat Air Greenlandimik tamakkiisumik piginnikkusupput

Naalagaaffik Air Greenlandimik 25 procentimik piginneqataavoq, SAS-ilu 37,5 procentinik piginneqataalluni. Piginneqataassutillu Naalakkersuisut pisiarerusuppaat. 

- Inuiaqatigiit akilersugassareqqippaat, angalasut akilersugassarivaat. Taamaammat uagut qatsupparput toqqorterluni taamatut inuiaqatigiinnut akiligassanik tunniussuineq, Pele Broberg oqarpoq.

Inatsisartut aningaasaqarnermut ataatsimiititaliaanni siulittaasup Hermann Berthelsenip nassuerutigaa pisoq matoqqasumik ingerlanneqartoq, annerusumillu oqaaseqarsinnaanani.

- Inatsisigut malillugit isertuussamik ingerlassaaq una, Naalakkersuisuninngaanniit peqquneqarpugut suliassaq isertuussatut ingerlanneqassasoq aamma inatsisartunut ilaasortatut minnerunngitsumik aningaasaqarnermut ataatsimiititaliamut ilaasortatut suliassat isertuussassat taamatut naqissusikkat pinngitsoornagit isertuuttussaavagut, Hermann Berthelsen oqarpoq.

Naalakkersuisut siulittaasuata naalakkersuisoqarfia nalunaarpoq, suliaq Inatsisartut aningaasaqarnermut akileraartarnermullu ataatsimiititaliaaniimmat Kim Kielsen pisoq pillugu oqaaseqarusunngitsoq. 

KNR-ip paasisai naapertorlugit Naalakkersuisut Air Greenlandimi piginneqataassutit tamaasa ukioq manna tigorusuppaaat.


 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat