Kangerlussuarmut Kangerlussuarmiillu angalasartut ilimagineqartutut 94 procentimik ikileriaateqassappata Kangerlussuarmiit Atlantiku qulaallugu angallassiinnartoqartarnissaanut tunngavissaqanngilaq, niuernermi pisortaq oqarpoq.

Air Greenlandip Kangerlussuarmiit nunanut allanut angallassisarnissi ilimaginngilaa

Air Greenlandip Kangerlussuup mittarfiata atuutiinnarnissaa periarfissanik ammaassisuunerarpaa, erseqqissaatigaali sumiiffinnut angallassassaanit apuuffigineqarusuttunuinnaq angallassisassallutik.

Nuummi Ilulissanilu mittarfissuartaartussanngoraluartugut Kangerlussuup mittarfissuaqarfittut atuutiinnarnissaa pillugu isumaqatigiissut naalakkersuisut Danmarkillu illersornissamut ministeriata pingasunngormat atsiormassuk sumiiffinni arlalinni innuttaasut nuannaarutigeqaat. Air Greenlandimit aamma tusarluaqaat.

- Isumaqarpugummi tunngaviusumik isumaqatigiissusiorneq pitsaasuusoq. Isumaqatigiissulli sunik imaqarnersoq ilisimanngilarput, Air Greenlandillu Kangerlussuarmut Kangerlussuarmiillu siunissami qanoq angallassikulatigisassanersoq naluarput, Air Greenlandip niuernermi pisortaa Maliina Abelsen oqarpoq.

Kangerlussuarmiit nunanut allanut angallassisalernissaq neriorsuutigerusunngikkaa

Isumaqatigiissut Air Greenlandip nunatsinni angallassinermi maannakkut qitiulluinnartumik atuisuuginnarnissaanut qanoq pingaaruteqartigissanersoq pisortamit annerusumik suli oqaaseqarfigineqanngilaq.

AAMMA ATUARUK Kangerlussuaq pillugu tunngaviusumik isumaqatigiissut: Kangerlussuarmi mittarfiup iluarsaannissaa Illersornissaqarfiup akilissavaa

Ilulissanimi Nuummilu mittarfissuassat ammarpata Kangerlussuarmukarlutik angalasartut ikilerujussuassapput. Rambøllip naatsorsuinerani inernerusut takutippaat, Nuummi Ilulissanilu mittarfissuassat 2023-mi ammarpata Kangerlussuarmut utimullu angalasartut 94 procentimik ikileriaateqarumaartut.

- Maannamut angallattakkatta amerlanerpaartaat Nuummukartuullutillu Ilulissanukartuusarmata nunanit allanit Kangerlussuarmut timmisartumik angallassisalerumaarnissarput ilimananngilaq. Angallattakkattali kissaateqarnerannit suut tamarmik allanngortarsinnaapput, Maliina Abelsen oqarpoq.

Angallassiuartuarsinnarnissaminnut isumalluartoq 

Siunissami angallattagassatik qassiujumaarnissaat nalornisigigaluarlugu isumalluarpoq.

- Imaassinnaavoq Kangerlussuarmut maanna takoriariartartut arlaatigut taama amerlatigitiinnarneqarsinnaasut, Maliina Abelsen oqarpoq.

AAMMA ATUARUK Principaftalen om Kangerlussuaq: Forsvaret betaler for renovering af landingsbane

Niuernermi pisortaq isumaqarpoq, Air Greenlandip Atlantiku qulaallugu angallavigisartagaata saniatigut angallavigilertagassaanik allanik soqutiginartunik pilersitsinissaminnut periarfissaqartoq.

- Angallattakkatsinnit piumaneqarluarpat nunatsinni angallavissanik nutaanik pilersitsinissamut periarfissaqarluartoq takorloorneqarsinnaavoq. Tamatumunnga atatillugu isumaqatigiissutip atuarnissaa erininarpoq. Taamaalilluta paasissagatsigu qanoq angallassitigikulasassanersugut, inuit qassit Kangerlussuarmiiginnassanersut il.il. Paasisaqarluarnissarput qilanaaraarput, Maliina Abelsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat