Air Greenlandip isornartorsiuineq paasisinnaannginnerarpaa
Danmarkip Narsarsuullu akornanni ukiuunerani timmisartuussisarnerit Air Greenlandip taamaatinniarlugit nalunaarutigereeraalu, Qaqortumi Sømandshjemi unnuiffigineqarpiassaarpoq. Sømandshjemmip sanaartornissamut pilersaarutaanut tamanna kalluisoq, Sømandshjemmip oqaatigaa.
Allattoq Mads Lynge
januaarip 08-at 2010 17:29
Atlantikorli qulaallugu Narsarsuarmut Narsarsuarmiillu timmisartuussisarnerit unitsinneqarsimanngitsut, Air Greenlandip nalunaarutigaa.
Taamaammat Qaqortumi Sømandshjemmip isornartorsiuinera Air Greenlandip paasisinnaannginnerarpaa. Niuernermut Air Greenlandimi pisortaq Odo Glashoff ima oqarpoq:
- Taamatut isornartorsiuisoqarnera tupigusuutigaara, aggustimi ilanngullugu Narsarsuarmut timmisartuussisarpugut. Mittarfiup aserfallaatsinissaa pissutigalugu maajimi juunimilu matoqqatinneqarpoq, Odo Glashoff oqarpoq.
Air Greenlandip timmisartuutaa Boeing 757 Narsarsualiartartoq novembarimi decembarimilu teknikkikkut aserfallatsaaliorneqarpoq.
Qaqortumi Sømandshjemmimi sanaartornissaq unitsivinneqassanersoq, Sømandshjemmip suli aalajangiiviginngilaa.
