Air Greenlandip Islandimut aqqutaa januaari tikillugu matoqqagallassasoq
Islandip nunattalu akornanni timmisartuussinerit 2021-mi januaarip naanissaata tungaanut matoqqagallassasut, timmisartuutileqatigiiffik tusagassiuutinut nalunaarummi allappoq.
Timmisartuutileqatigiiffiup silaannakkut aqqut taanna qanoq sivisutigisumik matoqqatinneqassanersoq suli naluaa, qaquguli ammaqqissinnaassanerannut maanna ulluliigallarpoq.
AAMMA ATUARUK Nunatta Islandillu akornanni timmisartuussinerit tamarmik corona pissutigalugu ataasinngorpamit taamaatinneqassasut
Nuup Keflavikkillu akornanni arfininngornikkut timmisartuussisoqartaraluarpoq, aqqullu taanna taamaatinneqarpoq.
Sullitat matumannga eqqorneqartut, bilitsimik utertitsinissamut Air Greenlandimiit attavigineqassapput. Bilitsi angalatitsinermik suliaqartumit imaluunniit tuniniaasumit allamit pisiaappat, pisiffigisamut saaffiginnittoqassasoq, Air Greenland allappoq.
Silaannakkut aqqut ullumikkut matusoq
Nunatta Islandillu akornanni silaannakkut aqqut ullumikkut matuvoq. Namminersorlutik Oqartussat angalasussat tamarmik sumiiffimmut ataatsimut katersorniarpaat. Tamanna Københavnip mittarfianiissalluni.
Taamaammat Islandimit nunatsinnut imaluunniit nunatsinnit Islandimut angalaniartut Københavniliaqqaarlutik tassanga ingerlaqqissinnaapput.
Namminersorlutik Oqartussat angalasut tamarmik sumiiffimmit ataatsimeersuutikkusuppaat, angalasullu tamarmik assigiimmik misissorneqartittarusullugit.
Corona pillugu aqutsisoqarfiup oqarnera naapertorlugu Islandimi misissuisarnerit ajornartoorfiusarnerat qaqutigooraluarpoq, angalasulli tamarmik mittarfimmit ataasiinnarmiilerunik nakkutigineqarnera ajornannginnerulissaaq. Københavnimiillu kisimik angalsoqartalissasoq, Namminersorlutik Oqartussat naliliipput.
Air Greenlandip Københavnimi napparsimmavissuaq isumaqatigiissuteqarfiginikuuaa, tassa angalasussat aallannginnerminni misissorteqqaartassasut, misissortinnerisalu inernerat Air Greenlandimut toqqaannartumik nassiunneqartassalluni.
