Air Greenlandip Dr. Hook-ikkut aavai
Ilaasut immikkorluinnaq ittut tassaapput nipilersoqatigiit Dr. Hook, Nuummi unnugu tusarnaartitsisussat.
Dr. Hook-ikkut ippassarli unnukkut Nuuliartussaagaluarput, kisianni timmisartorsuaq Floridamit Københavniliartoq kinguaattoormat, nipilersortartut Air Greenlandip timmisartorsuanut Nunatsinnukartumut angumersinngitsoorput.
Tamatumunnga taarsiullugu Dr. Hookikkut ullumi Islandiliarput, tassanngaanniit Kulusuk aqqusaarlugu Nuuliarnissaat pilersaarutaalluni. Kisianni silap ajornera pissutigalugu Air Icelandip Kulusummukarnissani taamaatiinnarmagu allatut eqqarsartoqartariaqalerpoq.
Taamaattumik Air Greenland aalajangerpoq Dr.Hookikkut Reykjavikimut aaneqartariaqartut, timmisartuutileqatigiiffiullu nalunaarutigaa nipilersortartut nalunaaqutaq 18.20 Nuummut tikissasut - taamaalillutillu unnugu tusarnaariartussat eqqissillutik tusarnaariarnissartik piareersaannarsinnaassavaat.