KNR-ip Naalakkersuisut siulittaasuat, Kim Kielsen, apersorniaraluarpaa. Tamannali suli iluatsinngilaq. Assi toqqorsivimmiitAssi: Camilla Dam/KNR

Air Greenlandimik pisineq: Ilaasut akiliinerusalernissamik naatsorsuuteqassanngillat

Danmark SAS-ilu Air Greenlandimi piginneqataassutiminnik tunisinerminni katillugit 461 millionit koruuninik pissassipput. Namminersorlutik Oqartussat ingerlatseqatigiiffinnut allattoqarfiat taama ilisimatitsivoq

Amerlasuut utaqqisaat kiisami piviusunngorpoq. Air Greenlandimut nunarput kisimiilluni piginnittuulerpoq. Tamanna Naalakkersuisut qallunaallu naalakkersuisuisa isumaqatigiissuteqarnerisigut pivoq.

- Namminersorlutik Oqartussat SAS-ip Danmarkillu piginneqataassutaannik piginnittuulernerannut aningaasaliineq pivoq, Namminersorlutik Oqartussat kisimiilluni piginnittuttut immikkut ittumik  461 milliuunit koruuninik Air Greenland A/S-imiit agguagarsineratigut, ingerlatseqatigiiffinnut allattoqarfimmi immikkoortoqarfimi pisortaq Lars Balslev KNR-imut ilisimatitsivoq.

Aningaasallu taakkua SAS-ip naalagaaffiullu Air Greenlandimi piginneqataassutaannut akiliutitut atorneqarput.

Ataatsikku akilissanngikkai

Air Greenlandilli agguagarsiat 461 millionit koruunit tamaviisa ataatsikkut aallaqqaammut akilissanngilai. Piginneqatigiiffimmi akiliinissaq aningaasartaqartikkumallugu bankinit 260 millionit koruuninik attartugassarsissasoq, Air Greenlandip pisortaanera Jacob Nitter Sørensen oqaluttuarpoq.

AAMMA ATUARUK Namminersorlutik Oqartussat Air Greenland pisiaraat

- Taakkualu maannamiit 2023-p tungaanut nafferarlugit akilersorneqassapput. Taamaalilluta akiitsugut mittarfiit nutaat atulertinnagit akileriissavagut, taanna oqarpoq.

Namminersorlutik Oqartussat taamaalillutik pisinerminni aningaasanik nunatta karsianiit ilanngaassanngillat. Illuanilli aamma akiitsunik taarsersuinerup nalaani piginneqataassutinit agguagarsissanngillat.

Kielsen oqaaseqaateqanngitsoq

Ilaasullu timmisartumut bilitsit akisunerulernissaat ilimagissanngikkaat, Jakob Nitter Sørensen oqarpoq.

- Ilaasutsinnit allaniilluunniit aningaasanik aallertannginniassagatta pilersaarusiuunneqareerpoq siunissamullu ungasinnerusumut missingersuusiamut ilanngunneqareerluni, Jakob Nitter Sørensen oqarpoq.

Tamatumunnga peqatigitillugu timmisartunut nutaanut Ilulissani, Nuummi Qaqortumilu mittarfissanut naleqquttunut aningaasaliinissanut pisariaqartunut missingersuusiami matussutissaqarpoq.

- Taamaalilluni piginneqatigiiffik sapinngisamik 2023-p naalernerani nutaanik timmisartuuteqarniassammat unammillertunullu taavalu nunatta iluani timmisartuussisarnissanut, kiffartuussinissamut isumaqatigiissutissanut allanullu piareersimaniassammat, Jakob Nitter Sørensen oqarpoq.

AAMMA ATUARUK Air Greenlandip pisiarinissaanut tunngasut Partii Naleqqap matoqqanerarlugit isornartorsiorai

Namminersorlutik Oqartussat naalagaaffiup SAS-illu Air Greenlandimi piginneqataassutaannik pisinerat Inatsisartut aningaasaqarnermut akileraartarnermullu ataatsimiititaliaannit akuerineqarsimasoq,  ingerlatseqatigiiffinnut allattoqarfimmi immikkoortoqarfimi pisortaq Lars Balslev KNR-imut ilisimatitsivoq.

Sooq Naalakkersuisut Air Greenlandimik tamakkiisumik piginnittuulerusunnersut, taavalu piginnittuulerneq qallunaat mittarfiliortiternermi aningasaleeqataaneranni piumasaqaataasimanersoq KNR-ip Naalakkersuisut siulittaasuannut, Kim Kielsenimut, qaammammi maanna ataasinngortumi apeqqutiginiarpaa.

Sulili akissutissarsinngilagut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat