Air Greenlandimi suliumajunnaartoqannginnissaa pillugu suli isumaqatigiinniarput
Illuatungeriit isumaqatigiinniarnitik ullaaq nangippaat, isumaqatigiissut ukiunut tulliuttunut atuuttussaq isumaqatigiissutiginiarneqassammat.
Inuillu sulinngiffeqarlutik angalanissaminnut pilersaarusiorsimasut isumaqatigiinniarnerit utaqqimaarpaat, suliumajunnaartoqannginnissaa soorunami neriuutigalugu. Taamaattoq ullmikkut pingasunngornermi timmisartuussinerit pilersaarutit malillugit ingerlanneqassasut, Air Greenlandip ilisimatitsissutigaa, timmisartuussinerillu tamarmik ulikkaaqqapput.
Ilaasussat 1400-t missaat timmisartuunneqassapput, tassa kitaani illoqarfiit akornanni timmisartuussinerit, Kulusummut siumut utimullu timmsartuussineq, Atlantikorlu qulaallugu Narsarsuarmiit Københavnimut timmisartuussineq, kiisalu Kangerlussuarmiit Københavnimut timmisartuussineq.
Suliumajunnaartoqalissagaluarpalli, inuillu tikiffissaminnut apuutinngitsuussagaluarpata, taava unnuisariaqarnermi aningaasartuutit Air Greenlandip matussusissavai.
Hotelimut inissinnermi nerisaqarnissamullu billetinik aningaasartuutinik matussusiisoqassaaq, namminerli aningaasartuutigisimasanik takussutissiinikkut aamma matussusiisoqarsinnaassalluni.
Billetit akilerneqareersut allanngortinneqarnissaat aningaasartuutaasimasullu matussuserneqarnissaat pillugu Air Greenland oqarasuaatikkut attaveqaammik sapaatiummat pilersitsivoq.
Attaveqaat inunnit sisamanit tallimanilluunniit inuttalerneqarpoq, ullormut akunnerni aqqaneq-marlunni ammatinneqartarluni.
Attaveqaatip ammarnerata kingorna ullut siulliit marluk saaffiginnittoqangaatsiarsimasoq ilisimatitsissutigineqarpoq, illuatungeriilli isumaqatigiinniarnitik ataasinngornerup unnukkuani nangimmassuk saaffiginnittut ikilisimasut oqaatigineqarpoq:
- Soorluuna inuit pissanngateqisut, illuatungeriillu isumaqatigiinnissaat neriuutigigaat, Air Greenlandimit paasissutissiisartoq Pia Christensen oqarpoq.
Københavnimi isumaqatiginninniarnerit Radioaviisimit soorunami malinnaavigaavut, unnugulu Radioaviisini sukumiinerusumik tusarliisinnaanissarput neriuutigaarput, soorlu aamma nittartakkatigut malinnaasoqarsinnaajumaartoq.
