Air Greenlandimi sulisut angummanniarsaripput

Saqisut sulinerminnik ulluni pingasuni unitsitsereersullu Air Greenlandimi sulisut kinguartoorutitik qaangerniarlugit ulappuseruttorput.

Air Greenlandimi angallannermut aqutsisoqarfimmeersoq Niels Chemnitz Frederiksen attaveqarfigaarput, killiffik pillugu paasiniaaffigilaarniarlugu.

- Tassa ajunngitsumik nalilersinnaavarput ullumikkut angallassinermut. Ullaarli timmisartuussivugut, marloriarluta Kangerlussuarmit Damarkiliartitsilluta. Kangerlussuarmi uninngasuutigut Nuuliartut ullumi apississapput, qulimiguulimmillu Kujataanut ingerlaartitsisimavugut, angumerisassat angumeralugit, Niels Chemnitz Frederiksen nassuiaavoq.

Angalasussat 400-t tungaanoortut sinnerussismanissaat ilimagaa, taakkulu arfininngornermi sapaammilu ingerlaqqissinnaassapput.

-Timmisartut marluk immikkut ittumik Maniitsup, Kangerlussuup Sisimiut Ilulissallu akornanni aqagu ingerlassissaaq. Taakku saniatigut timmisartoq ataaseq Qaanaaliassaaq, timmisartorsuarlu Danmarkimit Kangerlussualiartinneqassaaq, nangippoq.

Ilaasussallu sinneruttut aqagu ingerlaqqinngitsut sapaatiuppat apuunniarneqarput.

-Pilersaarutigaarput Uummannaminngaanniit sinerissamut Danmarkimullu ingerlaartut sapaatiuppat angallatissallugit.

Amigaatigiligassallu Nanortalik, Kulusuk Upernavillu aqagu pilersaarusiorfigineqassapput, angalasussat ulluni qaninnerni apuunniassammata.

Niels Chemnitz Frederiksen taama oqarpoq.

Angallassinerit mittarfinnut saaffiginninnikkut imaluunniit nittartakkami www.airgreenland.gl-imi paasisaqarfiginerusinnaavatit.