Air Greenland soraarnerussutisiassanut akilersuisarnerminik unitsitsigallarnissaminut akuerineqarportaaq, soorlu aamma akileraarutit A-nut akilersuinerit kinguartinneqarnissaat eqqarsaataasoq. Toqqorsivimmit assi

Air Greenlandimi sulisut akissarsiaasa affaat uninngatiinnarneqarallassasut

Air Greenland sulisuni peqatigalugit taakkua akissarsiaasa affaat angullugit uninngatiinnarneqarallarnissaat pillugu isumaqaqatigiissuteqarpoq.

Coronavirusip nunatsinni tuniluutilernera pissutaalluni Air Greenlandimi sulisut akissarsiami ilarujussuisa uninngatiinnarneqarnissaat akuerisimavaat.

Nittartakkatigut tusagassiisarfik Check-in.dk taama allaaserisaqarpoq.

Sulisut 540-sut akissaarsiaasa affaat angullugit uninngatiinnarneqarallarnissaat isumaqatigiissutaavoq. Coronavirusimik ajornartoornerup timmisartuutileqatigiiffiup ingerlatsineranut qanoq sivisutigisumik sunniuteqarnissaa apeqqutaatillugu isumaqatigiissut atuutsinneqassaaq.

- Suliatigut peqatigiiffiit isumaqatigiissusiorfigineqarput, siulersuisut, aqutsisut sulisullu akissarsiaqqortunerit akissarsiaasa affaat uninngatiinnarneqarsinnaallutik.

- Akissarsiat affaasa uninngatiinnarneqarneranniit akissarsiat milliartuaarnerat naapertorlugu uninngatiinnarneqartut milliartuaassapput, akissarsiaqqortunerit akissarsiaat annertunerusumik uninngatinneqassallutik, Air Greenlandip pisortaanera Jacob Nitter Sørensen oqarpoq.

Air Greenland soraarnerussutisiassanut akilersuisarnerminik unitsitsigallarnissaminut akuerineqarportaaq, soorlu aamma akileraarutit A-nut akilersuinerit kinguartinneqarnissaat eqqarsaataasoq.

AAMMA ATUARUK Coronavirusi Air Greenlandimut ilungersortitsisoq

Akissarsianut aningaasartuutit agguaqatigiissillugu 30 procentinik annikillineqarsinnaanissaat timmisartuutileqatigiiffiup aqutsisuisa naatsorsuutigaat. Soraarnerussutisiassanut akileraarutinullu A-nut akilersuinerit unitsikkallarneqarnerisigut kinguartinneqarnerisigullu kisitsit taanna marloriaatinngortinneqarsinnaavoq.

- Akiliisinnaassusitsinnut tamanna pitsaasuuvoq, naak akissarsiat 50 procentii angullugit uninngatinneqarallarnerat sulisutta ilaannut annernarsinnaagunaraluartoq.

- Tapersersorneqangaatsiarpugut, tamannalu nuannersuuvoq, Jacob Nitter Sørensen oqarpoq.

Kalaallit Nunaannut Kalaallit Nunaanniillu timmisartuussinerit ulluni 14-ini unitsikkallarneqarnissaannut aalajangertoqarneraniit ullumi sapaatip-akunneranngorpaa.

Coronavirusip tuniluunnerata pinaveersimatinneqarnissaa matumani anguniagaavoq.

Pissutsit ullumi atuuttut aallaavigalugit Air Greenland upalungaarsimanermi suleqataavoq, timmisartuutit oqartussanit atorneqarsinnaanngorlutik.

Timmisartuutigineqartut coronaviruseqarsinnaanermik misissortinnissamut atortunik, nakorsaatinik assartuinermut, sulisunillu pingaarutilinnik Danmarkimit angalatitsinermut atorneqarnerupput.

Isummersuutit