Air Greenlandimi saqisut suleqqilerput

Timmisartunut ilaasussanut nutaarsiassatsialammik ingerlateqqitassaqarpugut:

Saqisut sulinertik nangeqqippaat, pilersaarutillu malillugit ullumi timmisartuussisoqassalluni.

Air Greenlandimi tuniniaanermut pisortaq Jesper Kunuk Egede ima oqarpoq:

- Qujanartumik iluatsilerunarpoq. Timmisartuussinerit amerlanersaat pilersaarutit malillugit ingerlanneqassasut ilimagaarput. Ilaasussalli timmisartuunneqartussaagaluit ulluni kingullerni amerliartuinnavissimapput, ullumilu aqaguluunniit timmisartuunneqarsinnaanissaat ilimagaarput, Jesper Kunuk Egede oqarpoq, nangipporlu:

- Pilersaarutit nittartakkatsinni alakkarterneqarsinnaassapput, mittarfimmulli sianernikkut aamma paasiniaasoqarsinnaalluni, Air Greenlandimi tuniniaanermut pisortaq oqarpoq.

Kinguaattoortoqarnissaali ilimagineqarsinnaassaaq. Timmisartorsuaq Kastrupimiit Kangerlussualiartussaq akunnernik marlunnik kinguaattooqqalluni maanna ingerlaaleruttorpoq.

Unnuaq naangajavillugu illuatungeriit isumaqatiginninniarsimammata sulisut sinittariaqarsimapput, tamannalu pissutigalugu timmisartorsuaq akunnernik marlunnik kinguaattooqqalluni Københavnimiit nunatsinnukarpoq.