Air Greenlandimi saqisut 17. juli isumaqatiginniassapput
Tamanna pivoq timmisartortitseqatigiiffimmi saqisut suliumajunnaarnissaanik isumaqatigiissitsiniartartup sapaatit akunnerinik marlunnik kinguartitsilluni ippassaq nalunaaruteqarnerata kingorna.
Timmisartumi saqisut peqatigiiffianni Air Greenland Cabin Unionimi aqutsisut ataatsimeereernerminni piumasaqaatitik aalajangiusimallugit nalunaarput.
Sulinerminni unikkallartarnerminnik sivitsuinissamik piumasaqaatertik, timmisartut ingerlaarneranni saqisut amerlanerunissaat, soraarnerussutisiallu amerlineqarnissaannik piumasaqaatitik aalajangiusimallugit saqisut nalunaarput. Timmisartumi saqisut peqatigiiffiat timmisartortitseqatigiiffillu Air Greenlandip isumaqatigiinniartitai juunip ulluisa 13-ani sulisut atugaat pillugit isumaqatigiissuteqaraluarput, allakkatigulli tamanna taasissutigineqarmat ilaasortat amerlanerussuteqartut isumaqatigiissutigineqartoq itigartitsissutigaat.
Illuatungeriit isumaqatigissitsiniartartumik ataatsimeeqateqassapput juulip ulluisa 17-anni, tamannalu sioqqullugu, nutaamik isumaqatigiissuteqarnissaq siunertaralugu isumaqatiginniaqqissapput.
