Air Greenlandimi qullersat saqisullu oqaloqatigiipput

Air Greenlandimi saqisut sulinertik ullaaq aallarteqqippaat, timmisartullu sinerissami ilaasulerlutik angallasseqqilerput.

Saqisut sulinerminnik unititsillutik sulinermut tunngasunik ullut pingasut matuma siorna ataatsimiilermata, sinerissami ilaasut 1000-it missaaniittut mittarfinni aallarnissaminnut utaqqisinneqartarput aallanngittoortarlutillu.

Maanna saqisut peqatigiiffiat, Air Greenland Cabin Union Air Greenlandimilu qullersat, sapaatit akunnerata aallartilaarnerani ajornartorsiutit pilersut aaqqinniarlugit oqaloqatigiipput.

Air Greenlandip pisortaa, Michael Binzer maannakkuungallartoq oqaloqatigiinnerit ingerlanneqartut pillugit oqaasseqarusunngilaq. Saqisullu peqatigiiffiani siulittaasoq, Anders Mark Jensen, KNR-imut oqarpoq, qullersallu oqaloqatigiinneq ingerlanneqartoq naammassitinnagu oqaaseqarusunnani.

Illuatungeriilli tusagassiuutinut nalunaarput, tamarmik oqaloqatigiinneq iluasaartumik ingerlanneqarnissaa kissaatigineqartoq.

Saqisut sulinerminnut tunngasumik isumaqatigiissuut tunngavigalugu marlunngormat sulinerminnik unitsitipput, tamannalu isumaqatigiinniutigineqaqqinnissaa piumasaralugu.

Air Greenlandip qullersaasa saqisut piumasaqaataat akuerinagu ippassaq qallunaat nalunaaqqutaat malillugu ullaakkut qulinut, sulisartoqarneq pillugu eqqartuussivimmut saqisut sulinermik unititsinerat suliassanngortippaat.

Saqisullu sulisartoqarneq pillugu eqqartuussivimmit akiligassinneqarput, sulinermik unititsinerat inerteqqutaammat.