Air Greenlandimi piginneqatigiissutit SAS-ip tuniniarnialerpai

Timmisartuutileqatigiiffimmi SAS aningaasatigut ima ajornartorsiortigaaq Nunani Avannarlerni piginneqatigiissutit qitiutinneqarnissaat pingaartinnerulerniarlugu aalajangerluni.

Taamaammat Air Greenlandimi, BMI-mi, Spiritimi, Cubicimi, Trustimi, Estonian Airimi Skynewsimilu piginneqatigiissutini tuniniarniarlugit aalajangerpoq.

Sulisut 3.000-it soraarsittariaqalerpai. Aviisimi Berlingske Tidende-mi tamanna allaaserineqarpoq.

Tamatuma saniatigut sulisut 5.600-t timmisartuutileqatigiiffinnut allanut nuutsinneqartariaqassapput imaluunniit atukkiunneqartariaqassallutik.

Uuliap akisunerujussua aningaasarsiornikkullu ajornartorsiorneq pissutaalluni SAS-ip aningaasaqarniarnera ajorsilluinnarsimavoq.

SAS siorna 2008-mi 6,3 milliardi koruuninik amigartooruteqarpoq.

Danmarkimi SAS-imi pisortaaneq, Susanne Larsen, tunuarniarluni aalajangerpoq, Susanne Larsen ukiuni 40-ni timmisartuutileqatigiiffimmi sulereerpoq. Nutaarsiassaqartitsivimmit Ritzauimit tamanna ullaaq manna allaaserineqarpoq.

- Ukiut 40-t sulereerlunga tunuarnissara maanna aalajangiuppara, SAS-imi aamma allanngortitererujussuartussanngorpoq, Susanne Larsen oqarpoq.