Nunatsinnut angalasut juunip ulluisa 15-iannili sapaatip-akunneranut amerlanerpaamik 600-nnaasinnaasimapput. Tamanna ullumikkumit atorunnaarsinneqarpoq. Toqqorsivimmit assi.

Air Greenlandimi nutaanik suliffissaqartunganngitsoq: Sipaarniarpugut

Nunatsinnut angalasoqarsinnaaleqqinnera Air Greenlandimit nuannaarutigineqarpoq. Maajilli qaammataani soraarsinneqartut suliffigisimasaminni sulileqqikkallartussanganngitsut, pisortaq oqarpoq.

Qaamanerulaalerpoq.

Naalakkersuisut nunatta ammariartuaarneranut immikkoortoq nutaaq sapaatip-akunnerata siuliani saqqummiutereeraallu Air Greenlandip siunissaa taama isigineqalerpoq.

- Niuernerup tungaaniit ilaasartutsinnullu nuannaarutaangaatsiarpoq, Air Greenlandip pisortaanera, Jacob Nitter Sørensen KNR-imut oqarpoq.

Immikkoortoq nutaaq ullumikkut atuutilertoq nunatsinnut angalasunut atatillugu killilersuinernut qassiiusunut qasukkaavoq. Nunatsinnut tikittut sapaatip-akunneranut amerlanerpaamik 600-nissaannut killiliineq ilaatigut atorunnaarpoq.

Taamaammat qaammatini aggersuni pisiniartut aallaavigalugit billetsit neqeroorutigineqarsinnaalissapput.

Naalli tamanna pitsaasuugaluartoq, tamanna Air Greenlandimit maajip qaammataani soraarsinneqartut suliffimminnut uteqqissinnaanerannik isumaqanngilaq.

AAMMA ATUARUK Air Greenlandimi atorfillit 60-it suliffeerutissasut

Jacob Nitter Sørensenip oqarnernera naapertorlugu Namminersorlutik Oqartussat suliffeqarfiutaanni timmisartut amerlanerusut angalasinnaanissaannut maanna sulisut naammattumik aaqqissuussaaqqapput.

- Atorfinitsitseqattaalernissatsinnik siunertaqanngilagut. Sipaarniarpugut, pisariaqarallartillugulu sipaarniarallassalluta, Jacob Nitter Sørensen oqarpoq.

Ajornartoorneq qaangerluaraa

Coronap nunarsuaq tamakkerlugu tunillaassuunnera timmisartup sarpianut unitsitsisinnaanera eqqarsaatigalugu Air Greenlandimi siulersuisut ukiamut ukiumullu nalinginnaasumik timmisartuussisoqartarnissaa pilersaarutigaat.

Annaasat anguniarneqarsinnaanissaannut periarfissaqanngilaq, naalli inuit 60-it suliffimminnik annaasaqaraluartut atorfiillu 100-it atorunnaarsinneqaraluartut, Air Greenlandip ajornartooqqaneq maannamut qaangerluarsimagaa, Jacob Nitter Sørensen isumaqarpoq.

- Annernarsimavoq, kisianni suliniutigisagut piginnittuttalu pissutsinut atatillugu tapersersuilluartumik iliuuseqarnerat pissutigalugit qaangiilluarpugut, Jacob Nitter Sørensen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat