Air Greenlandimi ilaasoq puuttoq
Arnaq pineqartoq silaannakkut angallannermi inatsimmik unioqqutitsisimasutut timmisartumilu saqisumut nakuusersimasutut, Københavnip eqqartuussivianut maanna sassartinneqarpoq, tamannalu pissutigalugu parnaarussaasinnaalluni taarsiisussanngortitaasinnaallunilu.
Arnaq eqqarsartaatsimigut nappaateqartoq, timmisartornissaminut annilaangasimavoq, taamaammallu Københavnimi timmisartorsuarmut ikitinnani imigassamik vodkamik puiaasap affaanik imersimasoq, aviisip Ekstrabladep nittartagaani allaaserineqarpoq.
Qangattareerlutik timmisartumi saqisut ilaannik aaqqiagiinngissuteqalerpoq, taannalu kiivaa qitsuarlugulu toqunnissaanillu sioorasaarlugu.
Arnaq ima kamatsigaaq, allaat timmisartumi sulisut, ilaasut akisunermiittut nuutseriarlugit arnaq issiavimmut qilersuuttariaqarsimallugu.
Tamatuma kinguneranik Air Greenlandip Islandimut nunninnissani aalajangiuppaa, arnarlu niuteriarlugu oqartussanut tunniullugu.
Arnap inuusuttup taassuma pineqaatissinneqannginnermini eqqarsaatsimigut misissorneqarnissaa, Københavnimi eqqartuussiviup aalajangiukkaa, Sermitsiap nittartagaani allaaserineqarpoq.